నటుడిగా తనకంటూ ఒక ప్రత్యేక గుర్తింపు తెచ్చుకున్న అడివి శేష్, తొలిసారి ఒక భిన్నమైన ప్రేమకథ డెకాయిట్ మూవీతో ముందుకు వచ్చారు. ‘క్షణం’, ‘గూఢచారి’ వంటి సస్పెన్స్ థ్రిల్లర్ల తర్వాత శేష్ చేసిన ఈ ప్రేమ, పగ కలయిక చిత్రం ‘డెకాయిట్’. టీజర్, ట్రైలర్తో విజువల్స్ పరంగా అంచనాలు పెంచేసిన ఈ చిత్రం నేడు (ఏప్రిల్ 10) ప్రేక్షకుల ముందుకు వచ్చింది. మరి ఈ జంట బాక్సాఫీస్ వద్ద దెబ్బ కొట్టిందా లేదా అనేది చూద్దాం.
* కథేంటంటే..
తక్కువ కులానికి చెందిన హరి అలియాస్ హరిదాస్ (అడివి శేష్), అగ్ర కులానికి చెందిన సరస్వతి అలియాస్ జూలియట్ (మృణాళ్ ఠాకూర్) ప్రాణంగా ప్రేమించుకుంటారు. అయితే కులాల మధ్య ఉన్న గోడ వీరిద్దరినీ విడదీస్తుంది. ఈ క్రమంలోనే సరస్వతి పెట్టిన తప్పుడు సాక్ష్యం వల్ల హరి 13 ఏళ్లు జైలు శిక్ష అనుభవిస్తాడు. జైలు నుంచి పారిపోయి బయటకు వచ్చిన హరి, తన జీవితాన్ని నాశనం చేసిన సరస్వతిపై పగ తీర్చుకోవాలని నిర్ణయించుకుంటాడు. కానీ అప్పటికే ఆమె తీవ్రమైన కుటుంబ కష్టాల్లో, ఆర్థిక ఇబ్బందుల్లో ఉంటుంది. డబ్బు అవసరం కోసం ఈ మాజీ ప్రేమికులు ఇద్దరూ కలిసి దొంగతనాలు చేయాల్సి వస్తుంది. అసలు సరస్వతి తన ప్రియుడిని జైలుకు ఎందుకు పంపింది? వీరిద్దరి దొంగతనాలు ఎక్కడికి దారితీశాయి? చివరికి తన ‘జూలియట్’ కోసం హరి చేసిన త్యాగం ఏంటి? అనేదే మిగతా కథ.
* డెకాయిట్ మూవీ ఎలా ఉందంటే..
ప్రేమకథలకు ఎప్పుడూ ఆదరణ ఉంటుంది, కానీ దానికి ‘డెకాయిట్’ (దొంగతనం) అనే కొత్త కోణాన్ని జోడించి దర్శకుడు షానిల్ డియో ఈ చిత్రాన్ని తెరకెక్కించారు. మొదటి భాగం అంతా హీరో పగ, వారిద్దరూ కలిసి చేసే దొంగతనాలతో ఆసక్తికరంగా సాగుతుంది. ఇంటర్వెల్ వద్ద వచ్చే ట్విస్ట్ బాగుంటుంది.
సెకండాఫ్లో అసలు కథ వెలుగులోకి వస్తుంది. ముఖ్యంగా కరోనా సమయంలో హాస్పిటల్స్ చేసిన దోపిడీని, అప్పటి వైద్య వ్యవస్థలోని లోపాలను ఈ సినిమాలో బలంగా చూపించారు. ఇది సామాన్య ప్రేక్షకులకు బాగా కనెక్ట్ అవుతుంది. అయితే, క్లైమాక్స్లో వచ్చే త్యాగం, ట్విస్టులు కొంతవరకు పాత సినిమాలను గుర్తుకు తెస్తాయి. ప్రేక్షకులు ముందే ఊహించేలా ఉండటం వల్ల ఆ ఇంపాక్ట్ కొంత తగ్గినట్లు అనిపిస్తుంది. అయినప్పటికీ, విజువల్స్, కథలోని ఎమోషన్ సినిమాను నిలబెట్టాయి.
* ఎవరెలా చేశారంటే..
అడివి శేష్: ఈ సినిమాలో శేష్ ఒక కొత్త మేకోవర్లో కనిపించారు. యాసలో మార్పులు చేస్తూ డిఫరెంట్గా ట్రై చేశారు. కొన్ని చోట్ల డైలాగ్స్ అర్థం కాకపోయినా, యాక్షన్, ఎమోషనల్ సీన్లలో అదరగొట్టారు.
మృణాల్ ఠాకూర్: సరస్వతి పాత్రలో మృణాల్ మరోసారి మెస్మరైజ్ చేశారు. కళ్ళతోనే హావాభావాలు పలికించడంలో ఆమెది ప్రత్యేక శైలి. ఈ సినిమాలో ఆమె నటనకు మంచి స్కోప్ లభించింది.
ఇతరులు: విలన్ పాత్రలో అనురాగ్ కశ్యప్ తనదైన ముద్ర వేశారు. సునీల్, ప్రకాష్ రాజ్ తమ పరిధి మేర ఆకట్టుకున్నారు.
సాంకేతిక వర్గం: భీమ్స్ అందించిన సంగీతం, బ్యాక్ గ్రౌండ్ స్కోర్ సినిమాకు ప్రాణం పోశాయి. విజువల్స్ అద్భుతంగా ఉన్నాయి, ప్రతి ఫ్రేమ్ చాలా రిచ్గా కనిపిస్తుంది. నిర్మాణ విలువలు సినిమా స్థాయిని పెంచాయి.
* ప్లస్ పాయింట్స్:
అడివి శేష్, మృణాల్ నటన.
అద్భుతమైన విజువల్స్, బిజీయం.
కరోనా నాటి పరిస్థితులను చూపించిన తీరు.
* మైనస్ పాయింట్స్:
ఊహించదగ్గ క్లైమాక్స్.
అక్కడక్కడా నెమ్మదించిన కథనం.
కొన్ని డైలాగ్స్ స్పష్టంగా లేకపోవడం.
చివరిగా: ‘డెకాయిట్’.. ఒక భిన్నమైన ప్రేమ, పగ కలయిక. కమర్షియల్ హంగులతో పాటు మంచి ఎమోషన్ ఉన్న సినిమా కావాలనుకునే వారికి ఇది మంచి ఛాయిస్. ముఖ్యంగా శేష్, మృణాల్ అభిమానులకు ఇది నచ్చుతుంది.
రేటింగ్ : 2.75/5
మరిన్ని మూవీ రివ్యూ:
ఉస్తాద్ భగత్ సింగ్ మూవీ రివ్యూ అండ్ రేటింగ్
ధురంధర్ 2 ద రివెంజ్ మూవీ రివ్యూ అండ్ రేటింగ్
ది రాజాసాబ్’ మూవీ రివ్యూ అండ్ రేటింగ్
