ప్రస్తుతం దేశంలోని పశ్చిమ బెంగాల్, కేరళ రాష్ట్రాల్లో ప్రాణాంతక నిఫా వైరస్ (Nipah Virus) మళ్ళీ వ్యాప్తి చెందుతోంది. దీనిపై ప్రతి ఒక్కరూ అవగాహన కలిగి ఉండి ముందస్తు జాగ్రత్తలు పాటించాలని నిపుణులు చెబుతున్నారు. గబ్బిలాలు, పందుల ద్వారా సోకే ఈ వైరస్ కలుషిత ఆహారం, బాడీ ఫ్లూయిడ్స్ ద్వారా ఒకరి నుండి మరొకరికి వేగంగా వ్యాపిస్తుంది. దీనికి నిర్దిష్టమైన చికిత్స లేకపోవడంతో, సమస్యను ప్రాథమిక దశలోనే గుర్తించడం అత్యంత ముఖ్యం. సాధారణ జ్వరం, తలనొప్పితో మొదలై శ్వాసకోశ ఇబ్బందులు, మెదడువాపు వంటి తీవ్రమైన సమస్యలకు దారితీసే ఈ వైరస్ పట్ల ప్రజలు, హెల్త్కేర్ వర్కర్స్ అప్రమత్తంగా ఉండాలని అధికారులు సూచిస్తున్నారు. వైరస్ సోకిన వారు కోమాలోకి వెళ్లే ప్రమాదం కూడా ఉన్నందున, పరిశుభ్రత పాటించడం, అనారోగ్యంతో ఉన్న జంతువులకు దూరంగా ఉండటం ద్వారా మాత్రమే ఈ మహమ్మారిని అరికట్టగలము.
నిఫా వైరస్ లక్షణాలు, తీసుకోవాల్సిన జాగ్రత్తలు
ప్రధాన లక్షణాలు: జ్వరం, తీవ్రమైన తలనొప్పి, కండరాల నొప్పి, గొంతు నొప్పి, వాంతులు ప్రారంభంలో కనిపిస్తాయి.
తీవ్రమైన స్థితి: వైరస్ ముదిరితే మెదడువాపు, మూర్ఛలు, గందరగోళం, కోమాలోకి వెళ్ళే ప్రమాదం ఉంది.
వ్యాప్తి కాలం: వైరస్ సోకిన 4 నుండి 14 రోజులలోపు లక్షణాలు బయటపడతాయి, ఇవి కొన్నిసార్లు 45 రోజుల వరకు కొనసాగవచ్చు.
కారణాలు: కలుషితమైన పండ్లు తినడం, పక్షులు సగం తిన్న పండ్లను ముట్టుకోవడం, వ్యాధి సోకిన జంతువుల లేదా మనుషుల సాన్నిహిత్యం వల్ల వ్యాపిస్తుంది.
జాగ్రత్తలు: చేతులను సోపుతో శుభ్రంగా కడుక్కోవాలి, పండ్లను బాగా కడిగి మాత్రమే తినాలి, గబ్బిలాలు తిన్న పండ్లకు దూరంగా ఉండాలి.
రక్షణ: వ్యాధి సోకిన వారిని పరామర్శించేటప్పుడు గ్లౌజెస్, మాస్కులు ధరించాలి, బాధితులను ఐసోలేషన్లో ఉంచి చికిత్స అందించాలి.
ఇతర కథనాలు:
కంటికి కనిపించని మహమ్మారి: రక్తాన్ని నీరుగా మార్చే ఎబోలా వైరస్ ఎలా సోకుతుంది?
చలికాలంలో ఆరోగ్య సంరక్షణకు తీసుకోవలసిన జాగ్రత్తలు..!
ఏసీ’చిల్’.. ఆరోగ్యం’నిల్’!: తక్కువ డిగ్రీల వల్ల వచ్చే ముప్పు ఇదే!
బీ అలర్ట్: విజృంభిస్తున్న వైరల్ జ్వరాలు..
