ఒకప్పుడు సాఫ్ట్‌వేర్‌ ఉద్యోగం అంటే మంచి జీతం, స్థిరమైన జీవితం, భవిష్యత్తుపై భరోసా. అందుకే లక్షలాది మంది యువత ఐటీ రంగం వైపు అడుగులు వేశారు. కానీ ఇప్పుడు పరిస్థితులు వేగంగా మారుతున్నాయి. ఒకవైపు ఆర్టిఫిషియల్‌ ఇంటెలిజెన్స్‌ (ఏఐ) కొత్త అవకాశాలను సృష్టిస్తుంటే.. మరోవైపు పాత ఉద్యోగాల అవసరాన్ని తగ్గిస్తోంది. ప్రపంచవ్యాప్తంగా టెక్నాలజీ కంపెనీలు ఖర్చులు తగ్గించుకునేందుకు ఉద్యోగుల సంఖ్యను తగ్గిస్తున్నాయి. మైక్రోసాఫ్ట్‌, ఒరాకిల్‌, అమెజాన్‌, మెటా, నెట్‌ఫ్లిక్స్‌, సేల్స్‌ఫోర్స్‌ వంటి సంస్థల్లో ఉద్యోగాల కోతలు ఆందోళన కలిగిస్తున్నాయి. మైక్రోసాఫ్ట్‌ సుమారు 60 వేల మంది ఉద్యోగులకు స్వచ్ఛంద ఉద్యోగ విరమణ అవకాశం కల్పించినట్లు వచ్చిన వార్తలు ఈ పరిస్థితిని మరింత చర్చనీయాంశంగా మార్చాయి. అయితే ఈ మార్పులన్నింటికీ ఏఐ ఒక్కటే కారణం కాదు. కంపెనీల ఖర్చుల తగ్గింపు, వ్యాపార వ్యూహాల్లో మార్పులు కూడా ఉద్యోగాల కోతకు కారణమవుతున్నాయి.
ఏఐతో మారుతున్న టెక్ ఉద్యోగాల స్వరూపం
ప్రపంచవ్యాప్తంగా టెక్ రంగంలో ఉద్యోగాల కోతలు కొత్త విషయం కాదు. 2023లో సుమారు 2.65 లక్షల మంది ఉద్యోగాలు కోల్పోయినట్లు వివిధ నివేదికలు వెల్లడించాయి. ఆ తర్వాత కూడా పలు కంపెనీలు ఉద్యోగులను తగ్గించుకున్నాయి. ఇప్పుడు ఏఐ కోసం భారీగా పెట్టుబడులు పెడుతున్న సంస్థలు తమ పని విధానాలను మార్చుకుంటున్నాయి. డేటా సెంటర్లు, ఏఐ సాఫ్ట్‌వేర్‌, కొత్త టెక్నాలజీలపై ఖర్చు పెంచుతూ.. కొన్ని విభాగాల్లో ఉద్యోగుల సంఖ్యను తగ్గిస్తున్నాయి. సాధారణ కోడింగ్‌, డేటా ఎంట్రీ, కస్టమర్‌ సపోర్ట్‌, బ్యాంకుల కార్యాలయ పనుల్లో ఆటోమేషన్ పెరుగుతోంది. గతంలో మనుషులు గంటల తరబడి చేసిన పనులను ఏఐ టూల్స్‌ తక్కువ సమయంలో పూర్తి చేస్తున్నాయి. దీంతో కొన్ని పాత ఉద్యోగాల అవసరం తగ్గుతోంది. అదే సమయంలో ఏఐ, డేటా అనలిటిక్స్‌, సైబర్‌ సెక్యూరిటీ వంటి కొత్త నైపుణ్యాలు ఉన్నవారికి అవకాశాలు పెరుగుతున్నాయి.
భారత ఐటీ రంగంపై ఏఐ ప్రభావం ఎలా ఉండొచ్చు?
ఈ ప్రభావం భారత ఐటీ రంగంపైనా పడే అవకాశం ఉంది. దేశంలో లక్షలాది మంది యువత ఐటీ, సాఫ్ట్‌వేర్‌, బీపీఓ, డేటా అనలిటిక్స్‌, డిజిటల్‌ సేవల రంగాలపై ఆధారపడి ఉద్యోగాలు చేస్తున్నారు. టీసీఎస్‌, ఇన్ఫోసిస్‌, విప్రో, హెచ్‌సీఎల్‌ టెక్ వంటి ప్రముఖ కంపెనీలు ఇప్పటివరకు భారీ స్థాయిలో ఉద్యోగాల కోతలు చేపట్టకపోయినా.. కొత్త నియామకాల విషయంలో ఆశించినంత వేగం కనిపించడం లేదు. మరోవైపు స్టాండర్డ్‌ చార్టర్డ్‌, హెచ్‌ఎస్‌బీసీ, బార్క్లేస్‌ వంటి అంతర్జాతీయ బ్యాంకులు కూడా కొన్ని కార్యాలయ ఉద్యోగాలను తగ్గించే ప్రణాళికలు ప్రకటించాయి. అంటే ఏఐ ప్రభావం కేవలం సాఫ్ట్‌వేర్‌ కంపెనీలకే పరిమితం కాకుండా బ్యాంకింగ్‌, ఇతర సేవల రంగాలకూ విస్తరిస్తోంది. ముఖ్యంగా అనుభవం లేని కొత్త గ్రాడ్యుయేట్లకు ఉద్యోగం సంపాదించడం కష్టంగా మారుతోంది.
డిగ్రీతోపాటు ప్రాక్టికల్ నైపుణ్యాలు అవసరం
ఇక్కడ మరో ముఖ్యమైన సమస్య కూడా ఉంది. దేశంలో ఉద్యోగాల కోసం ఎదురుచూస్తున్న యువత సంఖ్య భారీగా పెరుగుతోంది. కానీ కంపెనీలు కోరుకునే నైపుణ్యాలు ఉన్న అభ్యర్థులు మాత్రం తగినంతగా దొరకడం లేదు. ఉదాహరణకు ఒక విద్యార్థి నాలుగేళ్లు బీటెక్‌ కంప్యూటర్‌ సైన్స్‌ చదివి మంచి మార్కులతో డిగ్రీ పూర్తి చేశాడనుకుందాం. అతనికి ప్రోగ్రామింగ్‌ భాషలపై పుస్తక పరిజ్ఞానం ఉండొచ్చు. కానీ నిజమైన ప్రాజెక్టులు చేయడం, సమస్యలకు పరిష్కారాలు కనుగొనడం, ఏఐ టూల్స్‌ ఉపయోగించడం, పరిశ్రమల్లో వాడే సాఫ్ట్‌వేర్‌పై అవగాహన లేకపోతే ఉద్యోగం దొరకడం కష్టమే. అంటే డిగ్రీలు ఉన్నా ఉద్యోగానికి అవసరమైన పనులు చేయగల సామర్థ్యం లేకపోవడం పెద్ద సమస్యగా మారుతోంది. ఇదే మన విద్యా వ్యవస్థకు, ఉద్యోగ మార్కెట్‌కు మధ్య ఉన్న అంతరం.
నీతి ఆయోగ్ కమిటీ దృష్టి.. విద్య నుంచి ఉద్యోగాల వరకు మార్పులు
నీతి ఆయోగ్ గుర్తించిన అంశాలు కూడా ఈ సమస్య తీవ్రతను తెలియజేస్తున్నాయి. ఉన్నత విద్య చదువుతున్న విద్యార్థుల్లో 80 శాతం మందికి ప్రాక్టికల్ అనుభవం, పరిశ్రమలతో పరిచయం లేదని, 34 శాతం మందికి అవసరమైన నైపుణ్యాలు లేవని, 18 శాతం మందికి ఇంటర్వ్యూలకు సరైన సిద్ధత లేదని నివేదిక పేర్కొన్నట్లు సమాచారం. ఈ పరిస్థితి మారాలంటే కళాశాలల్లో బోధన విధానంలో మార్పులు రావాలి. పుస్తకాలకే పరిమితం కాకుండా ప్రాజెక్టులు, ప్రయోగాలు, ఇంటర్న్‌షిప్‌లకు ప్రాధాన్యం ఇవ్వాలి. కంపెనీల అవసరాలకు అనుగుణంగా ప్రతి సంవత్సరం సిలబస్‌ను మార్చాలి. విద్యార్థులకు చదువుతోపాటు నిజమైన పని అనుభవం కల్పించాలి. ఏఐ టూల్స్‌ను ఎలా ఉపయోగించాలో కూడా నేర్పించాలి.
ఉద్యోగులకు శిక్షణ.. యువతకు కొత్త నైపుణ్యాలు అవసరం
మరోవైపు ఉద్యోగుల తొలగింపే కంపెనీలకు పరిష్కారం కాకూడదు. ఏఐ వల్ల కొన్ని పనుల అవసరం తగ్గితే, ప్రస్తుతం పనిచేస్తున్న ఉద్యోగులకు కొత్త టెక్నాలజీలపై శిక్షణ ఇచ్చి వేరే బాధ్యతలకు సిద్ధం చేయాలి. కొత్త ఉద్యోగాలు సృష్టించడంపైనా ప్రభుత్వాలు, కంపెనీలు దృష్టి పెట్టాలి. ఈ దిశగా విద్య నుంచి ఉద్యోగాల వరకు ఉన్న సమస్యలను పరిశీలించేందుకు నీతి ఆయోగ్ నాయకత్వంలో కేంద్ర ప్రభుత్వం ‘ఎడ్యుకేషన్‌ టు ఎంప్లాయ్‌మెంట్‌ అండ్‌ ఎంటర్‌ప్రైజ్‌’ (EEE) ఉన్నత స్థాయి కమిటీని ఏర్పాటు చేసింది. రాబోయే రోజుల్లో ఏఐ వల్ల ఉద్యోగాల స్వరూపం మరింత మారే అవకాశం ఉంది. అందుకే యువత కేవలం డిగ్రీలపైనే ఆధారపడకుండా కొత్త నైపుణ్యాలను నేర్చుకోవాలి. మారుతున్న టెక్నాలజీకి అనుగుణంగా తమను తాము మార్చుకోగలిగినవారికే భవిష్యత్తులో ఎక్కువ అవకాశాలు ఉంటాయి.
