అమెరికాలో వలసదారుల అంశం మరోసారి రాజకీయ చర్చకు కేంద్రంగా మారింది. ఇప్పటివరకు కఠిన నిర్ణయాలతో ముందుకెళ్లిన అధ్యక్షుడు డొనాల్డ్ ట్రంప్.. ఇప్పుడు తన విధానంలో కొన్ని తప్పులు జరిగాయని అంగీకరించడం ప్రాధాన్యం సంతరించుకుంది. ఉద్యోగాలు చేసుకుంటూ, ప్రభుత్వానికి పన్నులు చెల్లిస్తూ జీవిస్తున్న వారిని కూడా అక్రమ వలసదారుల పేరుతో ఇబ్బందులకు గురిచేయడం సరైన నిర్ణయం కాదని ఆయన అభిప్రాయపడ్డారు.
వలస విధానం కఠినంగా ఉందని అంగీకరించిన ట్రంప్
చిన్నపాటి నిబంధనల ఉల్లంఘనలకే దేశం విడిచి వెళ్లాల్సిన పరిస్థితి కల్పించడం వల్ల ప్రభుత్వం ప్రజల మద్దతు కోల్పోయిందని పేర్కొన్నారు. ఇలాంటి సాధారణ వలసదారులకు అమెరికాలో ఉండేందుకు చట్టపరమైన మార్గం కల్పించే అంశాన్ని భవిష్యత్తులో పరిశీలించవచ్చని తెలిపారు. మధ్యంతర ఎన్నికల్లో ఎదురైన ఓటమి తర్వాత ట్రంప్ నుంచి ఇలాంటి వ్యాఖ్యలు రావడం రాజకీయంగా ఆసక్తి కలిగిస్తోంది.
సరిహద్దుల భద్రతపై మాత్రం అదే వైఖరి
అయితే ఈ వ్యాఖ్యలను వలస విధానంలో పూర్తిస్థాయి మార్పుకు సంకేతంగా చూడలేం. అమెరికా సరిహద్దుల వద్ద అక్రమ ప్రవేశాలను అడ్డుకోవడంలో తమ ప్రభుత్వం విజయవంతమైందని ట్రంప్ చెబుతున్నారు. గత 17 నెలల్లో ఒక్కరు కూడా అక్రమంగా దేశంలోకి రాలేదని ఆయన పేర్కొన్నారు. అంటే సాధారణ వలసదారుల విషయంలో కొంత వెసులుబాటు ఇవ్వాలనే ఆలోచన ఉన్నా.. అక్రమ ప్రవేశాలు, నేరాలకు సంబంధించిన చర్యలను కొనసాగించాలన్నది ఆయన వైఖరిగా కనిపిస్తోంది. ఈ రెండు అంశాల మధ్య తేడాను ప్రభుత్వం ఎలా అమలు చేస్తుందన్నదే ఇప్పుడు కీలకం.
స్టీఫెన్ మిల్లర్ నియామకంతో కొనసాగుతున్న సందిగ్ధత
మరోవైపు ట్రంప్ వలస విధానాన్ని రూపొందించడంలో ముఖ్య పాత్ర పోషించిన స్టీఫెన్ మిల్లర్ మాత్రం కఠిన చర్యల విషయంలో వెనక్కి తగ్గే ప్రసక్తే లేదని స్పష్టం చేశారు. ఎన్నికల్లో ఓటమి వచ్చినా నేరాలకు పాల్పడిన అక్రమ వలసదారులను గుర్తించి దేశం నుంచి పంపించే కార్యక్రమం కొనసాగుతుందని ప్రకటించారు. వైట్‌హౌస్‌ చీఫ్‌ ఆఫ్‌ స్టాఫ్‌గా ఆయనకు బాధ్యతలు అప్పగించిన నేపథ్యంలో ఈ ప్రకటనకు మరింత ప్రాధాన్యం ఏర్పడింది. ట్రంప్ వ్యాఖ్యలు కొంత ఊరటనిచ్చేలా ఉన్నా.. ప్రభుత్వ యంత్రాంగం మాత్రం పాత విధానాన్నే కొనసాగించాలని చూస్తోంది. ఈ భిన్నమైన సంకేతాల మధ్య అమెరికా వలస విధానం ఏ దిశగా మారుతుందన్నది ఆసక్తికరంగా మారింది.
