Telugu News

పసిడి పతనం.. బంగారం ధరలను కిందికి లాగుతున్న శక్తులేవి?

బంగారం కొనాలంటే గతంలో ధరలు చూసి వెనక్కి తగ్గాల్సిన పరిస్థితి ఉండేది. ఇప్పుడు మాత్రం రోజురోజుకూ తగ్గుతున్న రేట్లు కొనుగోలుదారుల్లో కొత్త ఆశలు పెంచుతున్నాయి. ప్రస్తుతం 22 క్యారెట్‌ బంగారం గ్రాము ధర రూ.11,980కు చేరింది. అంటే 10 గ్రాముల ధర రూ.1,19,800. ఈ ఏడాది జనవరిలో ఇదే బంగారం గ్రాము ధర రూ.16,395 వరకు వెళ్లింది. అక్కడి నుంచి చూస్తే ఇప్పటికి దాదాపు 27 శాతం తగ్గింది. 24 క్యారెట్‌ బంగారం కూడా జనవరిలో గ్రాముకు రూ.17,885 ఉండగా.. ఇప్పుడు రూ.13,069కు పడిపోయింది. కేవలం భారత్‌లోనే కాదు.. అంతర్జాతీయ మార్కెట్‌లోనూ బంగారం ధరలు గణనీయంగా తగ్గుతున్నాయి. ఈ మార్పు వెనుక ప్రపంచ ఆర్థిక పరిస్థితుల్లో చోటుచేసుకుంటున్న పరిణామాలున్నాయి. అవేంటో ఇప్పుడు తెలుసుకుందాం.

అమెరికా వడ్డీ రేట్ల భయమే ప్రధాన కారణం

బంగారం ధరల పతనానికి ప్రధాన కారణం అమెరికా కేంద్ర బ్యాంకు ఫెడరల్‌ రిజర్వ్‌ వడ్డీ రేట్లపై మారిన అంచనాలు. అమెరికాలో ద్రవ్యోల్బణం ఇంకా పూర్తిగా అదుపులోకి రాకపోవడంతో వడ్డీ రేట్లను పెంచే అవకాశం ఉందనే చర్చ మొదలైంది. డిసెంబరులో కనీసం 0.25 శాతం వడ్డీ రేటు పెరగవచ్చని మార్కెట్లు అంచనా వేస్తున్నాయి. వడ్డీ రేట్లు పెరిగితే అమెరికా ప్రభుత్వ బాండ్లు, ఇతర స్థిర ఆదాయ పెట్టుబడుల నుంచి ఎక్కువ రాబడి వచ్చే అవకాశం ఉంటుంది. కానీ బంగారం నుంచి వడ్డీ రూపంలో ఆదాయం రాదు. అందుకే పెట్టుబడిదారులు బంగారాన్ని అమ్మి బాండ్లు, నగదు వైపు మళ్లుతున్నారు. ఈ అమ్మకాల ఒత్తిడి ధరలను మరింత కిందికి తీసుకెళ్తోంది.

డాలర్‌ బలపడటంతో అంతర్జాతీయంగా ప్రభావం

అమెరికా డాలర్‌ విలువ పెరగడం కూడా బంగారానికి ప్రతికూలంగా మారింది. ప్రస్తుతం డాలర్‌ దాదాపు 19 నెలల గరిష్ఠ స్థాయికి చేరింది. అంతర్జాతీయ మార్కెట్‌లో బంగారం ధర డాలర్లలో నిర్ణయిస్తారు. డాలర్‌ బలపడితే ఇతర దేశాల కరెన్సీలతో బంగారం కొనడం ఖరీదవుతుంది. దీంతో కొనుగోళ్లు తగ్గే అవకాశం ఉంటుంది. మరోవైపు అమెరికా, ఇరాన్‌ మధ్య యుద్ధం కారణంగా చమురు ధరలు పెరగడం, ద్రవ్యోల్బణం మళ్లీ పెరుగుతుందనే భయాలు కూడా ఉన్నాయి. సాధారణంగా యుద్ధాలు, ఆర్థిక అనిశ్చితి సమయంలో బంగారంపై పెట్టుబడులు పెరుగుతాయి. కానీ ఈసారి వడ్డీ రేట్ల పెంపు అంచనాలు, డాలర్‌ బలం ఆ ప్రభావాన్ని మించిపోయాయి.

ప్రపంచవ్యాప్తంగా పెట్టుబడుల మార్పులు

బంగారం ధరలు తగ్గడంతో వెండి కూడా భారీగా పడిపోయింది. జనవరిలో కిలో వెండి ధర రూ.4.10 లక్షల గరిష్ఠ స్థాయికి చేరగా.. నవంబర్‌ 19 నాటికి రూ.1.80 లక్షలకు తగ్గింది. అంటే 56 శాతానికి పైగా పతనమైంది. పెట్టుబడిదారులు బంగారం, వెండి నుంచి డబ్బును వెనక్కి తీసుకుని నగదు, అమెరికా ప్రభుత్వ బాండ్లలో పెట్టుబడులు పెడుతున్నారు. అయితే ప్రపంచ దేశాల కేంద్ర బ్యాంకులు మాత్రం బంగారం కొనుగోళ్లను పూర్తిగా ఆపలేదు. 2026 జనవరి నుంచి సెప్టెంబర్‌ వరకు అవి సుమారు 675 టన్నుల బంగారం కొనుగోలు చేసినట్లు అంచనాలున్నాయి. అంటే ఒకవైపు వ్యక్తిగత పెట్టుబడిదారుల అమ్మకాలు పెరుగుతున్నా.. మరోవైపు కేంద్ర బ్యాంకుల కొనుగోళ్లు కొనసాగుతున్నాయి. ప్రపంచ మార్కెట్‌లో ఈ రెండు భిన్నమైన ధోరణులు కనిపిస్తున్నాయి.

బంగారం ధరలు మళ్లీ పెరుగుతాయా? ఇంకా తగ్గుతాయా?

బంగారం ధరలు మళ్లీ పెరుగుతాయా? ఇంకా తగ్గుతాయా? అనేది ప్రధానంగా అమెరికా వడ్డీ రేట్లు, డాలర్‌ విలువ, ప్రపంచ దేశాల కేంద్ర బ్యాంకుల కొనుగోళ్లపై ఆధారపడి ఉంటుంది. వడ్డీ రేట్లు పెరిగి డాలర్‌ బలంగా కొనసాగితే బంగారంపై ఒత్తిడి ఉండొచ్చు. అదే సమయంలో వడ్డీ రేట్లు తగ్గడం, డాలర్‌ బలహీనపడటం లేదా అంతర్జాతీయ ఉద్రిక్తతలు పెరగడం జరిగితే ధరలు మళ్లీ కోలుకునే అవకాశం ఉంది. భారత్‌లో రూపాయి విలువ, దిగుమతి ఖర్చులు, పండుగలు, పెళ్లిళ్ల సీజన్‌లో ఆభరణాల డిమాండ్‌ కూడా ధరలను ప్రభావితం చేస్తాయి. ప్రస్తుత ధరల తగ్గుదల కొనుగోలుదారులకు కొంత ఊరటనిచ్చినా.. ఇదే స్థాయిలో ధరలు కొనసాగుతాయని చెప్పలేం. అందుకే బంగారం కొనాలనుకునేవారు రోజువారీ ధరలతో పాటు మార్కెట్‌ పరిస్థితులను కూడా గమనించాలి.

Show More
Back to top button