గతేడాది డిసెంబరులో ఏ మాత్రం అంచనాల్లేకుండా వచ్చి సంచలనం సృష్టించిన సినిమా ‘ధురంధర్’. సీక్వెల్ గురించి అప్పుడే క్లారిటీ ఇచ్చిన చిత్రబృందం, ఇప్పుడు అదే మాటపై నిలబడి ‘ధురంధర్: ద రివెంజ్’ని థియేటర్లలోకి తీసుకొచ్చేశారు. స్పై యాక్షన్ థ్రిల్లర్ జానర్లో తెరకెక్కిన ఈ రెండో భాగాన్ని హిందీతో పాటు తెలుగు, తమిళ, కన్నడ, మలయాళ భాషల్లో విడుదల చేశారు. మరి ఈ చిత్రం తొలి భాగాన్ని మించిపోయిందా లేదా అనేది రివ్యూలో చూద్దాం.
కథేంటి?
రెహమాన్ డెకాయిట్ (అక్షయ్ ఖన్నా) మరణంతో పార్ట్ 1 ముగుస్తుంది. ఆ తర్వాత ల్యారీకి తానే నాయకుడినని అర్షద్ పప్పు (అశ్విన్ ధర్) ప్రకటించుకుంటాడు. అన్న చావుకు కారణమైన అర్షద్పై రెహమాన్ సోదరుడు ఉజెయిర్ బలోచ్ (డానిష్) పగతో ఉంటాడు. వీరిద్దరిని కాదని, ల్యారీని భారత సీక్రెట్ ఏజెంట్ హమ్జా (రణ్వీర్ సింగ్) తన గుప్పిట్లోకి తెచ్చుకుంటాడు. ఐబీ చీఫ్ అజయ్ సన్యాల్ (మాధవన్) అప్పగించిన పనులన్నీ పూర్తి చేస్తూ పాక్ ఉగ్రవాదుల కుట్రలను హమ్జా తిప్పికొడుతుంటాడు. అసలు హమ్జా ఇండియన్ ఏజెంట్ అనే విషయం ఎలా బయటపడింది? మేజర్ ఇక్బాల్ (అర్జున్ రాంపాల్) అతడిని ఎలా ఎదుర్కొన్నాడు? ఉగ్రవాదులకు మార్గనిర్దేశం చేస్తున్న ‘బడే సాహెబ్’ ఎవరు? పంజాబ్ జైలులో ఉన్న జస్కరిత్ సింగ్ రంగీనే ఈ ఆపరేషన్ కోసం ఎందుకు ఎంచుకున్నారు? అనేది మిగతా కథ.
ఎలా ఉందంటే..
ఉగ్రవాదాన్ని అంతం చేయడానికి ఒక జైలు ఖైదీని సీక్రెట్ ఏజెంట్గా పంపడం అనే కొత్త పాయింటే ‘ధురంధర్’ విజయానికి కారణమైంది. ఆ చిత్రానికి కొనసాగింపుగా వచ్చిన ‘ధురంధర్: ద రివెంజ్’ కూడా అదే రేంజ్లో ఆకట్టుకునేలా ఉంది. యాక్షన్, థ్రిల్లింగ్ ఎలిమెంట్స్తో పాటు ఈసారి ఎమోషన్కి కూడా పెద్ద పీట వేశారు. పార్ట్ 1 చూసిన వారు వెంటనే ఆ ప్రపంచంలోకి వెళ్ళిపోతారు, చూడని వారికి కూడా అర్థమయ్యేలా కథను చాప్టర్ల వారీగా విభజించారు.
హమ్జా పాత్ర ఫ్లాష్బ్యాక్తో మొదలయ్యే సన్నివేశాలు ఒళ్లు జలదరింపజేస్తాయి. ల్యారీ పీఠం కోసం హమ్జా ఆడే మైండ్ గేమ్, ఉగ్రవాదుల ఎత్తులను చిత్తు చేసే సీన్లు థియేటర్లలో చప్పట్లు కొట్టిస్తాయి. 2016 నోట్ల రద్దు ఘటనను, మాఫియా డాన్ దావూద్ అంశాన్ని కథకు ముడిపెట్టడం ఆసక్తికరంగా ఉంది. ఫస్టాఫ్ కాస్త స్లోగా ఉన్నా, ఇంటర్వెల్ ట్విస్ట్ అదిరిపోతుంది. ఇక సెకండాఫ్ మొత్తం ఉత్కంఠగా సాగుతూ చివరి 30 నిమిషాల్లో వచ్చే ట్విస్టులు ప్రేక్షకులను థ్రిల్కు గురి చేస్తాయి. క్లైమాక్స్ ఎమోషనల్గా ముగుస్తుంది.
ఎవరెలా చేశారంటే..
రణ్వీర్ సింగ్: హమ్జా పాత్రలో ఆయన ఒదిగిపోయారు. యాక్షన్ సీన్లతో పాటు ఎమోషనల్ సీన్లలోనూ అదరగొట్టేశారు.
అర్జున్ రాంపాల్: పాకిస్తాన్ మేజర్ ఇక్బాల్గా అద్భుతమైన నటన కనబరిచారు.
సంజయ్ దత్ & మాధవన్: ఎస్పీ చౌదరిగా సంజయ్ దత్, ఐబీ చీఫ్గా మాధవన్ తమ పరిధి మేరకు మెప్పించారు.
ప్లస్ పాయింట్స్:
రణ్వీర్ సింగ్ పవర్ఫుల్ పర్ఫార్మెన్స్.
సెకండాఫ్లో వచ్చే ఉత్కంఠభరితమైన ట్విస్టులు.
శాశ్వత్ సచ్దేవ్ నేపథ్య సంగీతం.
మైనస్ పాయింట్స్:
ఫస్టాఫ్లో కొన్ని సాగదీత సీన్లు.
తొలి భాగంతో పోలిస్తే పెరిగిన నిడివి.
చివరిగా: ‘ధురంధర్: ద రివెంజ్‘.. తొలి భాగానికి ఏ మాత్రం తగ్గకుండా పక్కా యాక్షన్ థ్రిల్లర్ ప్రియుల కోసం తీసిన సినిమా. పార్ట్ 1 నచ్చిన వారికి ఇది ఒక మంచి విందు లాంటిది!
రేటింగ్ : 3.5/5
