సందర్శకులకు అద్భుతమైన అనుభూతిని, ప్రశాంతమైన వాతావరణం, చారిత్రక కోటల కలయిక వంటివి అందిచే వాటిలో మహారాష్ట్రలోని సుందరమైన మాల్వన్ బీచ్ ఒకటి. కాబట్టి ఇప్పుడు దీనికి సంబంధించిన ట్రిప్ వివరాలు, దీనిని ఎలా ప్లాన్ చేసుకోవాలి వంటి విషయాలను ఇప్పుడు తెలుసుకుందాం.
మాల్వన్ ట్రిప్ ప్లాన్ వివరాలు
మాల్వన్ మహారాష్ట్రలోని సింధుదుర్గ జిల్లాలో ఉంది. ఈ బీచ్ను సందర్శించడానికి ప్లాన్ చేసుకునే వారు, ఈ ప్రయాణం సుమారు 3 నుంచి 5 రోజులు పడుతుందని గుర్తుంచుకోవాలి. బీచ్ అందాలను పూర్తిగా ఆస్వాదించడానికి, సూర్యోదయం లేదా సూర్యాస్తమయం సమయాలు ఉత్తమమైనవి. ఈ సమయంలో వాతావరణం చల్లగా, దృశ్యాలు రమణీయంగా ఉంటాయి.
ప్రయాణ మార్గం (హైదరాబాద్ నుంచి):
హైదరాబాద్ నుంచి మాల్వన్ బీచ్ దూరం దాదాపు 707 కిలోమీటర్లు. ఈ దూరాన్ని నేరుగా రైలు లేదా బస్సు మార్గంలో చేరుకోవడం కొంచెం కష్టం. అందుకే, సాధారణంగా ఇక్కడి నుంచి ముందుగా గోవాకు (దాదాపు 650 కి.మీ) చేరుకోవడం సులభం. గోవాకు చేరుకున్న తర్వాత, అక్కడి నుంచి మాల్వన్ బీచ్కు బస్సు లేదా స్థానిక రైలు మార్గాల ద్వారా చేరుకోవచ్చు. మీరు ఎంచుకున్న రవాణా మార్గాన్ని బట్టి ప్రయాణ సమయం ఆధారపడి ఉంటుంది.
మాల్వన్లో చూడాల్సిన ప్రముఖ బీచ్లు:
మాల్వన్ కేవలం ఒక బీచ్కే పరిమితం కాదు, చుట్టుపక్కల అనేక రమణీయమైన బీచ్లు ఉన్నాయి. అవి:
దేవ్గాగ్ బీచ్
కోలంబ్ బీచ్
చివ్లా బీచ్
ఆచార బీచ్
తీర్కర్లి బీచ్ (ఇది స్కూబా డైవింగ్, స్నార్కెలింగ్కు ప్రసిద్ధి చెందింది)
తొండవాలి బీచ్
వైరీ భట్వాడి బీచ్
అర్సే మహల్ బీచ్
ఈ బీచ్లు కాకుండా, మరాఠా వీరుడు ఛత్రపతి శివాజీ నిర్మించిన చారిత్రక సింధుదుర్గ్ కోటను కూడా తప్పకుండా సందర్శించాలి. ఇది మాల్వన్ తీరానికి దగ్గరలోనే ఉంది.
టూర్ బడ్జెట్ అంచనా (ఒకరికి):
ట్రిప్ ఖర్చు ఎంచుకున్న రవాణా మరియు వసతిపై ఆధారపడి ఉంటుంది. సాధారణంగా ఒకరికి రోజువారీ ఖర్చులు ఇలా ఉండవచ్చు:
ప్రయాణ ఖర్చు: మీరు ఎంచుకునే రవాణా మార్గం (రైలు, బస్సు లేదా సొంత వాహనం) ప్రకారం ఉంటుంది.
ఆహార ఖర్చు: రోజుకు ఒక వ్యక్తికి రూ. 400 – రూ. 600 వరకు కేటాయించుకోవచ్చు. ఇక్కడ లభించే స్థానిక మాల్వానీ వంటకాలు, ముఖ్యంగా సీ-ఫుడ్ చాలా ప్రసిద్ధి.
ఎంట్రీ టికెట్/ఇతర ఖర్చులు: కోటలు లేదా ఇతర సందర్శనా స్థలాల ప్రవేశ రుసుములు, చిన్న చిన్న ఖర్చుల కోసం రోజుకు రూ. 200 – రూ. 300 కేటాయించవచ్చు.
షాపింగ్/అనుకోని ఖర్చుల కోసం: అదనంగా రూ. 1,500 నుంచి రూ. 2,000 వరకు తీసుకెళ్లడం మంచిది.
