అమరావతిలో ఏర్పాటు కానున్న క్వాంటం వ్యాలీ ప్రాజెక్ట్కి దేశవాళీ సంస్థ క్యూపీఐఏఐ (QPIAI) కీలక భాగస్వామిగా ముందుకొచ్చింది. ఈ ప్రాజెక్టు మీద ముఖ్యమంత్రి చంద్రబాబు నాయుడు ఇటీవల క్యూపీఐఏఐ ప్రతినిధులతో ముఖ్యమైన చర్చలు నిర్వహించారు. నేషనల్ క్వాంటం మిషన్లో భాగంగా ఏర్పాటయ్యే ఈ క్వాంటం వ్యాలీలో 8 క్యూబిట్ ఆధారిత క్వాంటం కంప్యూటర్ను అభివృద్ధి చేయనున్నట్టు సమాచారం.
ఈ క్వాంటం సెంటర్ విద్యార్థులు, పరిశోధకులు, స్టార్టప్లకు ఉపయోగపడేలా ఉండాలని ముఖ్యమంత్రి సూచించారు. అమరావతిలో సెంటర్ ఆఫ్ ఎక్సలెన్స్ను కూడా ఏర్పాటు చేయాలని ఆయన అభిప్రాయపడ్డారు. కేవలం సాంకేతికతకు మాత్రమే పరిమితం కాకుండా, దీనివల్ల సామాన్య ప్రజలకు ప్రయోజనం కలిగేలా పని చేయాలన్నారు.
క్వాంటం టెక్నాలజీ వ్యవసాయం, నీటి నిర్వహణ, హెల్త్కేర్ రంగాల్లో విస్తృతంగా ఉపయోగపడే అవకాశం ఉందని ప్రభుత్వం భావిస్తోంది. పంటల తెగుళ్ల అంచనాలు, సమయానుకూల సలహాలు, మెరుగైన నీటి వినియోగం, వ్యాధుల గుర్తింపు వంటి వాటికి ఇది ఉపయుక్తంగా మారనుంది. క్వాంటం సిమ్యులేషన్ ద్వారా మెడికల్ రంగంలోనూ మెరుగుదల కనిపించనుందని అంచనా.
ఈ ప్రాజెక్టు ద్వారా యువతకు నైపుణ్యాలను అందించాలన్నది లక్ష్యం. డీప్ టెక్నాలజీని వినియోగిస్తూ విద్య, పరిశోధన, ఇన్నోవేషన్లో రాష్ట్రాన్ని ముందుకు తీసుకెళ్లాలన్నది ప్రభుత్వ యోచన. సామాజిక, ఆర్థిక పరంగా కూడా ఇది ప్రభావం చూపించే అవకాశముందని ముఖ్యమంత్రి పేర్కొన్నారు.
క్యూపీఐఏఐ సంస్థతో కలిసి అమరావతిని క్వాంటం టెక్నాలజీ కేంద్రంగా అభివృద్ధి చేయాలని ప్రభుత్వ ప్రణాళిక. దేశంలోనే మొదటిసారిగా అమలవుతున్న ఈ తరహా ప్రాజెక్టు ద్వారా ఆంధ్రప్రదేశ్కు గౌరవం తేవడమే కాకుండా, భవిష్యత్తు తరాలకు సాంకేతికంగా శక్తిని అందించాలన్నదే చంద్రబాబు లక్ష్యం.
