ఆంధ్రప్రదేశ్లో కొత్తగా మూడు జిల్లాలు మరియు ఐదు రెవెన్యూ డివిజన్ల ఏర్పాటుకు ముఖ్యమంత్రి చంద్రబాబు నాయుడు అంగీకారం తెలిపారు. జిల్లాల పునర్విభజన, డివిజన్లు, మండలాల మార్పు చేర్పులపై నవంబర్ 25వ తేదీన సచివాలయంలో జరిగిన కీలక సమీక్షలో ఆయన ఈ నిర్ణయం తీసుకున్నారు. మంత్రుల కమిటీ సమర్పించిన నివేదికను సమీక్షించిన అనంతరం ముఖ్యమంత్రి మార్పు చేర్పులకు ఆమోదం తెలిపారు.
ముఖ్యమంత్రి అంగీకరించిన కొత్త మూడు జిల్లాల్లో చిరకాలంగా డిమాండ్లో ఉన్న మార్కాపురం మరియు మదనపల్లి జిల్లాలు ఉన్నాయి. వీటితో పాటు రంపచోడవరం కేంద్రంగా పోలవరం జిల్లాను ఏర్పాటు చేసేందుకు కూడా ముఖ్యమంత్రి గ్రీన్ సిగ్నల్ ఇచ్చారు. కొత్తగా ఏర్పాటు చేయనున్న జిల్లాలు, రెవెన్యూ డివిజన్లకు సంబంధించి ఈ సాయంత్రం ప్రభుత్వం అధికారికంగా నోటిఫికేషన్ను విడుదల చేయనుంది.
నూతన జిల్లాల ఏర్పాటుతో పాటుగా, రాష్ట్రంలో కొత్తగా ఐదు రెవెన్యూ డివిజన్లను ఏర్పాటు చేయడానికి కూడా ముఖ్యమంత్రి నిర్ణయం తీసుకున్నారు. అనకాపల్లి జిల్లాలో నక్కపల్లి, ప్రకాశం జిల్లాలో అద్దంకి, కొత్తగా ఏర్పాటయ్యే మదనపల్లి జిల్లాలో పీలేరు, నంద్యాల జిల్లాలో బనగానపల్లె, శ్రీసత్యసాయి జిల్లాలో మడకశిర ప్రాంతాలను కొత్త రెవెన్యూ డివిజన్లుగా ఏర్పాటు చేయనున్నారు.
వీటితో పాటుగా కర్నూలు జిల్లాలో పెద్ద హరివనాన్ని కొత్త మండలంగా ఏర్పాటు చేయాలని నిర్ణయించారు. అలాగే ఆదోని మండలాన్ని విభజించి మరొక కొత్త మండలాన్ని ఏర్పాటు చేసేందుకు కూడా ముఖ్యమంత్రి ఆమోదం తెలిపారు. ఈ మార్పులు రాష్ట్ర పరిపాలనా వికేంద్రీకరణలో మరియు పాలనా సౌలభ్యం కోసం దోహదపడతాయని ప్రభుత్వం భావిస్తోంది.
