అమెరికాను ప్రపంచంలోనే అత్యంత శక్తివంతమైన ప్రజాస్వామ్య దేశంగా, ఇజ్రాయెల్ను పశ్చిమాసియాలోనే ఏకైక ప్రజాస్వామ్య వ్యవస్థగా ప్రపంచవ్యాప్తంగా పెద్ద ఎత్తున ప్రచారం చేస్తుంటారు. వినడానికి ఈ మాటలు ఎంతో గొప్పగా అనిపించినప్పటికీ.. క్షేత్రస్థాయిలో ఈ రెండు దేశాలు ప్రవర్తిస్తున్న తీరును గమనిస్తే మాత్రం ఒళ్లు గగుర్పొడుస్తుంది. ఇటీవల జరిగిన కొన్ని అంతర్జాతీయ ఉదంతాలు ఈ అగ్రరాజ్యాల ప్రజాస్వామ్య ముసుగును ముక్కలు ముక్కలు చేస్తూ, వారి అసలు క్రూరమైన రంగును లోకానికి చాటిచెప్పాయి. ప్రపంచ శాంతిని, ఇతర దేశాల సార్వభౌమత్వాన్ని కాలరాస్తూ తాము పట్టిన కుందేటికి మూడే కాళ్లు అన్నట్లుగా ప్రవర్తిస్తున్న ఈ దేశాల చర్యలను చూస్తుంటే.. వీరు చెప్పే ప్రజాస్వామ్య సూత్రాలు కేవలం దయ్యాలు వేదాలు వల్లించినట్లుగా మాత్రమే కనిపిస్తున్నాయి.
దిగ్భ్రాంతికి గురిచేసిన ఇటీవలి నాలుగు దారుణ ఉదంతాలు
ఇటీవలి కాలంలో అమెరికా, ఇజ్రాయెల్ కూటమి కలిసి చేసిన నాలుగు ప్రధాన ఘటనలు ప్రపంచాన్ని తీవ్ర దిగ్భ్రాంతికి గురిచేశాయి. మొదటిది, ఈ ఏడాది జనవరిలో అర్ధరాత్రి వేళ వెనిజులా దేశాధ్యక్షుడు నికోలస్ మదురోను, ఆయన భార్యను అమెరికా బలగాలు అపహరించడం. రెండవది, ఇరాన్తో ఒకవైపు ఆశావహంగా శాంతి చర్చలు సాగుతుండగానే, ఎలాంటి ముందస్తు హెచ్చరికలు లేకుండా ఫిబ్రవరి 26, 28 తేదీల్లో ఇజ్రాయెల్తో కలిసి అమెరికా అకస్మాత్తుగా దాడులకు తెగబడటం. మూడవది, ఈ దాడులలో ఇరాన్ అత్యున్నత నేత ఖమేనీని ఆయన కుటుంబంతో సహా దారుణంగా బలితీసుకోవడం. నాల్గవది, ఈ నెల 21, 22 తేదీలలో స్విట్జర్లాండ్లో ఇరాన్ అధ్యక్షుడు పెజెష్కియాన్ నేతృత్వంలోని ప్రతినిధులతో చర్చలు జరుగుతున్న సమయంలో.. తాము చెప్పిన ఒప్పందంపై సంతకాలు చేయకపోతే స్వదేశానికి తిరిగి వెళ్లలేరంటూ అమెరికా బహిరంగంగా బెదిరింపులకు దిగడం. అంతేకాకుండా, ఎంతో ఘనమైన చరిత్ర గల ఇరాన్ నాగరికతను రాత్రికిరాత్రి తుడిచిపెట్టేస్తామంటూ అమెరికా అధ్యక్షుడు డోనాల్డ్ ట్రంప్ బూతు మాటలతో తీవ్ర హెచ్చరికలు జారీ చేయడం వారి అహంకారానికి పరాకాష్టగా నిలిచింది.
చరిత్ర పుటల్లో అమెరికా అమానుషాల రక్తచరిత్ర!
ఇలాంటి దారుణాలు కేవలం ఇప్పుడే కాదు.. అమెరికా గత చరిత్రను తిరగేస్తే ఇంతకంటే భయంకరమైన కుట్రలు ఎన్నో కనిపిస్తాయి. ఆఫ్రికాలోని డెమోక్రటిక్ రిపబ్లిక్ ఆఫ్ కాంగో సహజ వనరులను తమకు అప్పగించనందుకు గాను, 1961లో ఆ దేశ ప్రజాస్వామ్య అధ్యక్షుడు పాట్రిస్ లుముంబాను దారుణంగా హత్య చేయడమే కాకుండా.. ఆయన శరీరాన్ని ముక్కలుగా నరికి సల్ఫ్యూరిక్ యాసిడ్లో వేసి కరిగించి ఆనవాళ్లు లేకుండా చేశారు. అలాగే, 2000వ సంవత్సరంలో ఇరాక్ అధ్యక్షుడు సద్దాం హుస్సేన్ వద్ద సామూహిక మారణాయుధాలు ఉన్నాయంటూ తప్పుడు ఆరోపణలు సృష్టించి ఆయనను మరణశిక్షకు గురిచేశారు. ఆ తర్వాత తమ వద్ద ఎలాంటి ఆధారాలు లేవని అమెరికా అధికారులే స్వయంగా ఒప్పుకున్నారు. క్యూబా విప్లవ వీరుడు, మాజీ అధ్యక్షుడు ఫిడెల్ క్యాస్ట్రోను చంపడానికి అమెరికా ఏకంగా 638 సార్లు నమ్మశక్యం కాని రీతిలో కుట్రలు, హత్యాయత్నాలు చేసింది. తమ సామ్రాజ్యవాద ప్రయోజనాలకు లొంగని ప్రజాస్వామ్య దేశాల నేతలను అణచివేయడానికి అగ్రరాజ్యాలు చేసిన కుట్రలు ప్రపంచవ్యాప్తంగా లెక్కలేనన్ని ఉన్నాయి.
అబద్ధాల ముసుగులో ఇజ్రాయెల్, అమెరికా స్వార్థ రాజకీయం
ఇలాంటి అరాచకాలన్నింటినీ చేస్తూ.. తాము ఇదంతా “ప్రజాస్వామ్య పరిరక్షణ” కోసమే చేస్తున్నామని ఈ కూటమి చెప్పుకోవడం అత్యంత హాస్యాస్పదం. ఇరాన్ అణ్వస్త్రాలను తయారు చేస్తోందంటూ గత పాతికేళ్లుగా ఇజ్రాయెల్ ప్రపంచాన్ని అబద్ధాలతో నమ్మిస్తోంది. అక్కడి నియంతృత్వ పాలనను కూలదోసి ప్రజలకు స్వేచ్ఛను ఇస్తామని సరికొత్త రాగాలు తీస్తోంది. అసలు ఒక దేశంలో మార్పు తీసుకువచ్చే అధికారం పక్క దేశానికి ఎక్కడి నుంచి వస్తుంది? ఇజ్రాయెల్ ఎలాంటి అనాగరిక చర్యలకు పాల్పడినా, అది ఏకైక ప్రజాస్వామ్యం కాబట్టి అందరూ సమర్థించాలంటూ అమెరికా, యూరప్ దేశాలు గొంతు చించుకుంటున్నాయి. చర్చల మధ్యలోనే దాడులు చేస్తూ, ఒక స్కూలుపై క్షిపణి దాడి చేసి 160 మంది అమాయక పిల్లలను బలితీసుకున్న రోజున కూడా ఈ అగ్రరాజ్యాల్లో కనీస పశ్చాత్తాపం లేకపోవడం వారి క్రూరత్వానికి అద్దం పడుతోంది.
అధికార దాహం.. ద్వంద్వ ప్రమాణాల ప్రజాస్వామ్యం
నిజానికి, పశ్చిమాసియాలోని అరబ్ రాజ్యాలలో ఎక్కడా ప్రజాస్వామ్యం లేదు, అవన్నీ కేవలం షేక్ల కుటుంబ రాజ్యాలు మాత్రమే. కానీ అక్కడ ప్రజాస్వామ్యం లేనందుకు అమెరికా కూటమికి ఎలాంటి చింతలు లేవు. ఎందుకంటే ఆయా కుటుంబ రాజ్యాలు తమ వ్యాపార, రాజకీయ ప్రయోజనాలకు అనుకూలంగా లొంగి ఉన్నాయి కాబట్టి, వారి మనుగడకు కావలసిన అన్ని రకాల సహాయ సహకారాలను అమెరికానే ముందుండి అందిస్తోంది. ఒక పక్షం చెప్పినట్లే వినాలని, లేదంటే దేశాన్నే తుడిచిపెట్టేస్తామని బెదిరించడం చర్చల విధానం అనిపించుకోదు. అది పచ్చి రౌడీయిజం. ఇలాంటి స్వార్థపూరిత అధికార దాహంతో కూడిన ద్వంద్వ విధానాలు పాటిస్తూ, అగ్రరాజ్యాలు ప్రజాస్వామ్యం గురించి మాట్లాడటం అంటే లోకాన్ని నవ్వులపాలు చేయడమే.
