ఏఐ డేటా సెంటర్లు.. లాభమెంత? నష్టమెంత?
ఏఐ డేటా సెంటర్లతో దేశానికి పెట్టుబడులు, డిజిటల్ అభివృద్ధి, సమాచార భద్రత పెరుగుతున్నా.. విద్యుత్, నీటి వినియోగం, పర్యావరణ ప్రభావం, ఉపాధిపై తలెత్తుతున్న ప్రశ్నలను ఈ విశ్లేషణలో తెలుసుకోండి.
మనం పంపే ప్రతి సందేశం, చూసే ప్రతి వీడియో, చేసే ప్రతి ఆన్లైన్ చెల్లింపు వెనుక పెద్ద వ్యవస్థ పనిచేస్తోంది. అదే ఏఐ డేటా సెంటర్లు. వేల సంఖ్యలో కంప్యూటర్లు, సమాచారాన్ని భద్రపరిచే పరికరాలు ఒకేచోట నిరంతరం పనిచేసే కేంద్రాలివి. కృత్రిమ మేధ వినియోగం పెరిగిన తర్వాత వీటి అవసరం మరింత ఎక్కువైంది. బ్యాంకింగ్, ఆన్లైన్ వ్యాపారం, ప్రభుత్వ సేవలు, వైద్యం, విద్య, పరిశోధన వంటి రంగాలన్నీ ఇప్పుడు వీటిపై ఆధారపడుతున్నాయి. ప్రపంచవ్యాప్తంగా 11 వేలకుపైగా డేటా సెంటర్లు ఉండగా, భారత్లోనూ వాటి సంఖ్య వేగంగా పెరుగుతోంది. ముంబయి, చెన్నై, హైదరాబాద్, బెంగళూరు, నోయిడా వంటి నగరాలు వీటికి ప్రధాన కేంద్రాలుగా మారాయి. ఈ రంగంలోకి భారీ పెట్టుబడులను తీసుకురావాలనే ఉద్దేశంతో కేంద్ర, రాష్ట్ర ప్రభుత్వాలు కంపెనీలకు భూములు, పన్ను మినహాయింపులు, చౌక విద్యుత్ వంటి రాయితీలు అందిస్తున్నాయి. అయితే ఈ అభివృద్ధికి దేశం చెల్లించాల్సిన అసలు ధర ఎంత అనే ప్రశ్న ఇప్పుడు కీలకంగా మారింది.
ఏఐ డేటా సెంటర్ల వల్ల దేశానికి కలిగే ప్రయోజనాలు
డేటా సెంటర్లు దేశంలో ఉండటం వల్ల మన సమాచారం విదేశాలకు వెళ్లకుండా ఇక్కడే భద్రంగా నిల్వ ఉంటుంది. దీనివల్ల సమాచార భద్రత పెరగడంతో పాటు విదేశీ సంస్థలపై ఆధారపడటం తగ్గుతుంది. ఆన్లైన్ సేవలు వేగంగా అందుతాయి. కృత్రిమ మేధ పరిశోధనలు, కొత్త సాంకేతిక పరిజ్ఞానం, బ్యాంకింగ్, వైద్యం, విద్య, వ్యాపార రంగాల అభివృద్ధికి అవసరమైన బలమైన వ్యవస్థ ఏర్పడుతుంది. విదేశీ పెట్టుబడులు రావడం వల్ల నిర్మాణం, విద్యుత్, భద్రత, సమాచార వ్యవస్థల వంటి అనుబంధ రంగాలకు కూడా పని లభిస్తుంది. కానీ వీటి ద్వారా లక్షల ఉద్యోగాలు వస్తాయనే ప్రచారంలో పూర్తి నిజం లేదు. నిర్మాణ సమయంలో ఎక్కువ మందికి పని దొరికినా అది తాత్కాలికమే. కేంద్రం పనిచేయడం మొదలైన తర్వాత నిర్వహణకు పరిమిత సంఖ్యలో సిబ్బంది సరిపోతారు. ఆ ఉద్యోగాలు కూడా సాధారణంగా కంప్యూటర్, విద్యుత్, శీతలీకరణ వ్యవస్థలపై ప్రత్యేక పరిజ్ఞానం ఉన్నవారికే దక్కుతాయి. కాబట్టి పెట్టుబడి భారీగా ఉన్నప్పటికీ ప్రజలకు నేరుగా లభించే ఉపాధి మాత్రం ఆశించిన స్థాయిలో ఉండకపోవచ్చు.
ఏఐ డేటా సెంటర్లలో విద్యుత్, నీటి వినియోగం ఎందుకు పెద్ద సవాలు
ఈ రంగంలో బయటకు కనిపించని పెద్ద ఖర్చు విద్యుత్, నీరు. డేటా సెంటర్లలోని కంప్యూటర్లు రోజంతా పనిచేయడం వల్ల విపరీతంగా వేడెక్కుతాయి. వాటిని చల్లగా ఉంచేందుకు శీతలీకరణ పరికరాలను నిరంతరం నడపాలి. దీంతో ఒక పెద్ద ఏఐ డేటా సెంటర్ చిన్న నగరానికి అవసరమయ్యేంత విద్యుత్ను వినియోగించే పరిస్థితి ఉంటుంది. భారత్లో వేసవికాలంలోనే విద్యుత్కు భారీ డిమాండ్ ఉంటుంది. ఇలాంటి సమయంలో డేటా సెంటర్లకు నిరంతరం చౌక విద్యుత్ అందిస్తే గృహాలు, వ్యవసాయం, చిన్న పరిశ్రమలపై భారం పడవచ్చు. సర్వర్లను చల్లబరిచేందుకు రోజుకు లక్షల లీటర్ల నీరు అవసరమయ్యే కేంద్రాలు కూడా ఉన్నాయి. ఇప్పటికే తాగునీటి కొరతను ఎదుర్కొంటున్న నగరాల్లో ఇలాంటి ప్రాజెక్టులు వస్తే ప్రజలు, రైతుల అవసరాలకు అందాల్సిన నీరు పరిశ్రమల వైపు మళ్లే ప్రమాదం ఉంది. బొగ్గుతో ఉత్పత్తి చేసిన విద్యుత్ను వాడితే కాలుష్యం కూడా పెరుగుతుంది. చివరకు కంపెనీలకు లాభాలు వస్తే.. నీటి కొరత, విద్యుత్ ఒత్తిడి, పర్యావరణ నష్టం మాత్రం సమాజంపై పడుతుంది.
ఏఐ డేటా సెంటర్ల అభివృద్ధికి భారత్ అనుసరించాల్సిన మార్గం
ఈ సమస్యలను ముందుగానే గుర్తించిన ఐర్లాండ్, సింగపూర్, నెదర్లాండ్స్ వంటి దేశాలు కొత్త డేటా సెంటర్లకు నియమాలు కఠినం చేశాయి. అవి డిజిటల్ అభివృద్ధిని ఆపలేదు. అందుబాటులో ఉన్న నీరు, విద్యుత్, పర్యావరణ పరిస్థితులకు తగిన ప్రాజెక్టులనే అనుమతిస్తున్నాయి. భారత్ కూడా ఇదే దారిని అనుసరించాలి. ఏ ప్రాంతంలో డేటా సెంటర్ ఏర్పాటు చేసినా అక్కడి నీటి లభ్యత, విద్యుత్ సామర్థ్యం, పర్యావరణంపై పడే ప్రభావాన్ని ముందుగా అంచనా వేయాలి. తాగునీటికి బదులుగా శుద్ధిచేసిన మురుగునీటిని వాడటం, వర్షపు నీటిని నిల్వ చేయడం, సౌర–పవన విద్యుత్ను ఉపయోగించడం తప్పనిసరి చేయాలి. కంపెనీలు పొందే రాయితీలకు తగినట్లుగా స్థానిక యువతకు శిక్షణ, ఉద్యోగాలు కల్పించాలి. దేశ డిజిటల్ భవిష్యత్తుకు డేటా సెంటర్లు అవసరమే. కానీ అభివృద్ధి పేరుతో ప్రజల నీరు, విద్యుత్, భూమిని విచక్షణ లేకుండా అప్పగించకూడదు. ప్రయోజనాలు ప్రజలకు చేరి, ప్రకృతిపై భారం తగ్గినప్పుడే అవి నిజమైన అభివృద్ధికి కేంద్రాలవుతాయి.
ఇతర కథనాలు:
కేంద్ర బడ్జెట్ 2026: రూ. 53.47 లక్షల కోట్లతో నవ భారత నిర్మాణానికి బలమైన పునాది!
రూ.లక్ష కోట్లతోవిశాఖలో డేటాసెంటర్..!
