అమెరికాలో ఉద్యోగాల కోసం వెళ్లాలనుకునే విదేశీయులకు హెచ్-1బీ వీసా అత్యంత కీలకమైన మార్గం. ముఖ్యంగా భారతీయ ఐటీ నిపుణులు ఈ వీసా ద్వారా పెద్ద ఎత్తున అమెరికాలో ఉద్యోగాలు పొందుతున్నారు. అయితే ఈ వీసాల విషయంలో అమెరికా అధ్యక్షుడు డొనాల్డ్ ట్రంప్ మరోసారి కఠిన వైఖరి అవలంబించారు. విదేశీ ఉద్యోగులను నియమించుకునే సంస్థలపై విధించిన లక్ష డాలర్ల హెచ్-1బీ ఫీజును మరో ఏడాది పాటు కొనసాగించాలని ఆయన నిర్ణయించారు. దీనికి సంబంధించిన ఎగ్జిక్యూటివ్ ఆర్డర్పై తాజాగా సంతకం చేశారు. సాధారణంగా హెచ్-1బీ వీసా దరఖాస్తుల ఖర్చును ఆయా కంపెనీలే భరిస్తాయి. గతంలో ఈ ప్రక్రియకు కొన్ని వేల డాలర్లు మాత్రమే ఖర్చవుతుండగా, ట్రంప్ ప్రభుత్వం గత ఏడాది సెప్టెంబరులో ఆ మొత్తాన్ని ఏకంగా లక్ష డాలర్లకు పెంచింది. ఇప్పుడు ఆ నిబంధన గడువు ముగియనున్న నేపథ్యంలో మరో 12 నెలల పాటు పొడిగించింది.
హెచ్-1బీ ఫీజును ఎందుకు కొనసాగించారు?
ట్రంప్ ప్రభుత్వం ఈ నిర్ణయానికి ప్రధాన కారణంగా అమెరికన్ ఉద్యోగుల ప్రయోజనాలను చెబుతోంది. విదేశాల నుంచి తక్కువ ఖర్చుతో ఉద్యోగులను తీసుకురావడం వల్ల స్థానికులకు అవకాశాలు తగ్గుతున్నాయని వాదిస్తోంది. ఫీజును భారీగా పెంచడం ద్వారా అత్యంత నైపుణ్యం కలిగిన ఉద్యోగులను మాత్రమే కంపెనీలు ఎంపిక చేసుకుంటాయని ప్రభుత్వం భావిస్తోంది. అలాగే ఐటీ సేవలను విదేశాలకు అవుట్సోర్స్ చేసే సంస్థల హెచ్-1బీ రిజిస్ట్రేషన్లు 92 శాతం వరకు తగ్గినట్లు అమెరికా ప్రభుత్వం పేర్కొంది. దీని వల్ల అమెరికన్ కార్మికులు, కొత్తగా చదువు పూర్తిచేసుకున్న గ్రాడ్యుయేట్లకు మరిన్ని అవకాశాలు లభిస్తున్నాయని చెబుతోంది. అయితే అమెరికాలోనే విద్యార్థి వీసాపై ఉండి హెచ్-1బీకి మారే వారికి ఈ ఫీజు వర్తించదు. అలాగే ఇప్పటికే అమెరికాలో ఉండి వీసా స్టేటస్ మార్చుకునే దరఖాస్తుదారులకు కూడా మినహాయింపు ఉంటుంది. ప్రధానంగా విదేశాల నుంచి కొత్తగా వచ్చే అభ్యర్థులకే ఈ భారీ రుసుము వర్తిస్తుంది.
హెచ్-1బీ ఫీజుపై కోర్టుల్లో కొనసాగుతున్న వివాదం
అయితే ఈ నిర్ణయం చట్టపరమైన వివాదాలకు కూడా దారితీసింది. అమెరికాలోని 20 రాష్ట్రాల అటార్నీ జనరల్స్ ఈ ఫీజును వ్యతిరేకిస్తూ బోస్టన్ కోర్టును ఆశ్రయించారు. ఆ ఫీజు చట్టవిరుద్ధమని ఒక కోర్టు ఇప్పటికే అభిప్రాయపడగా, మరికొన్ని ఫెడరల్ కోర్టుల్లో ఈ అంశంపై విచారణ కొనసాగుతోంది. అయినప్పటికీ న్యాయపరమైన సవాళ్లు ఉన్న సమయంలోనే ట్రంప్ ప్రభుత్వం ఈ ఫీజు విధానాన్ని మరో ఏడాది పొడిగించడం చర్చనీయాంశంగా మారింది. హెచ్-1బీ వీసాల ద్వారా లబ్ధి పొందుతున్న వారిలో భారతీయులే అత్యధికంగా ఉండటంతో ఈ నిర్ణయం భారత ఐటీ రంగంపై కూడా ప్రభావం చూపే అవకాశం ఉందని విశ్లేషకులు భావిస్తున్నారు. కంపెనీలకు ఖర్చు పెరగడం వల్ల విదేశీ నియామకాల సంఖ్య తగ్గే అవకాశం ఉండగా, అమెరికాలో ఉద్యోగాల కోసం ఎదురు చూస్తున్న భారతీయ నిపుణులు కూడా ఈ పరిణామాలను ఆసక్తిగా గమనిస్తున్నారు.
