అనుభవం- అభివృద్ధి-అభ్యుదయం: చంద్రబాబు నాయుడు 75 వసంతాల రాజకీయ ప్రస్థానం

నారా చంద్రబాబు నాయుడు గారు 1950 ఏప్రిల్ 20న చిత్తూరు జిల్లా నారావారిపల్లిలో జన్మించారు. విద్యార్థి దశలోనే నాయకత్వ లక్షణాలు పుణికిపుచ్చుకున్న ఆయన, 1975లో యూత్ కాంగ్రెస్ ద్వారా రాజకీయాల్లోకి ప్రవేశించారు. 1978లో తన 28వ ఏటనే చంద్రగిరి నుండి తొలిసారి ఎమ్మెల్యేగా గెలుపొంది, అతి పిన్న వయసులోనే మంత్రిగా బాధ్యతలు చేపట్టారు. అనంతరం నందమూరి తారక రామారావు గారి స్ఫూర్తితో తెలుగుదేశం పార్టీలో చేరి, పార్టీ బలోపేతంలో కీలక పాత్ర పోషించారు. ఉమ్మడి ఆంధ్రప్రదేశ్‌కు సుదీర్ఘకాలం ముఖ్యమంత్రిగా పనిచేయడమే కాకుండా, జాతీయ రాజకీయాల్లో కింగ్ మేకర్‌గా చక్రం తిప్పారు. దేవేగౌడ, ఐ.కే. గుజ్రాల్ వంటి వారిని ప్రధానులుగా చేయడంలో ఆయన పోషించిన పాత్ర చరిత్రలో నిలిచిపోతుంది.

విజనరీ లీడర్: ఐటీ విప్లవం, హైదరాబాద్ అభివృద్ధి

చంద్రబాబు గారు అంటేనే ‘అభివృద్ధి’కి మారుపేరు. నేడు గ్లోబల్ మ్యాప్‌లో హైదరాబాద్ ఒక ఐటీ హబ్‌గా వెలుగుతోందంటే అది ఆయన విజన్ ఫలితమే. 90వ దశకంలోనే ఐటీ ప్రాధాన్యతను గుర్తించి, మైక్రోసాఫ్ట్ వంటి దిగ్గజ సంస్థలను హైదరాబాద్‌కు రప్పించారు. హైటెక్ సిటీ నిర్మాణం, సైబరాబాద్ ఏర్పాటు ద్వారా లక్షలాది మంది యువతకు ఉపాధి కల్పించారు. కేవలం టెక్నాలజీయే కాదు, గచ్చిబౌలి స్పోర్ట్స్ కాంప్లెక్స్, అంతర్జాతీయ విమానాశ్రయం, ఔటర్ రింగ్ రోడ్ వంటి ప్రాజెక్టులతో హైదరాబాద్ రూపురేఖలను మార్చేశారు. ‘విజన్ 2020’ ద్వారా భవిష్యత్తు అవసరాలను ముందే ఊహించి ప్రణాళికలు రచించిన ఘనత ఆయనది.

ప్రజల కోసం పథకాలు

అభివృద్ధిని, సంక్షేమాన్ని జోడు గుర్రాలలా నడిపించడం చంద్రబాబు గారి పాలనా శైలి. గతంలో ‘జన్మభూమి’ కార్యక్రమం ద్వారా ప్రజలను పాలనలో భాగస్వాములను చేశారు. మహిళా సాధికారత కోసం ‘డ్వాక్రా’ (DWCRA) గ్రూపులను బలోపేతం చేసి, లక్షలాది మంది మహిళల జీవితాల్లో వెలుగులు నింపారు. ప్రస్తుతం నాలుగోసారి సీఎంగా బాధ్యతలు చేపట్టాక, ‘సూపర్ సిక్స్’ హామీలతో పేదలకు అండగా నిలుస్తున్నారు. ‘దీపం 2.0’ ద్వారా గ్యాస్ సిలిండర్ల పంపిణీ, ‘తల్లికి వందనం’, వృద్ధులకు పెన్షన్ల పెంపు (ఎన్టీఆర్ భరోసా) వంటి పథకాలు క్షేత్రస్థాయిలో ప్రజలకు ఎంతో మేలు చేస్తున్నాయి. పరిపాలనలో టెక్నాలజీని (e-Governance) జోడించి, అవినీతికి తావులేకుండా సేవలను ప్రజల ముంగిటకు చేర్చారు.

నవ్యాంధ్ర నిర్మాణం: అమరావతి మరియు పోలవరం

రాష్ట్ర విభజన తర్వాత ఎన్నో సవాళ్లు ఎదురైనప్పటికీ.. ధైర్యంగా నిలబడి నవ్యాంధ్ర నిర్మాణానికి పూనుకున్నారు. ప్రపంచస్థాయి రాజధానిగా అమరావతిని తీర్చిదిద్దడమే లక్ష్యంగా ఆయన అహర్నిశలు శ్రమిస్తున్నారు. రాష్ట్రానికి జీవనాడి అయిన పోలవరం ప్రాజెక్టును త్వరితగతిన పూర్తి చేసేందుకు కృతనిశ్చయంతో ఉన్నారు. 2027 నాటికి ఈ ప్రాజెక్టును జాతికి అంకితం చేయాలనే సంకల్పంతో పనులు వేగవంతం చేశారు. 75 ఏళ్ల వయసులో కూడా అదే ఉత్సాహంతో, అనుభవాన్ని జోడించి ఆంధ్రప్రదేశ్‌ను దేశంలోనే అగ్రగామి రాష్ట్రంగా నిలబెట్టేందుకు ఆయన చేస్తున్న కృషి అనితరసాధ్యం.

మరిన్ని వార్తలు:

సీఎం చంద్రబాబుకు ‘బిజినెస్‌ రిఫార్మర్‌ ఆఫ్‌ ద ఇయర్‌’ పురస్కారం

‘ముఖ్యమంత్రి’గా అసాధారణ శకం: చంద్రబాబు నాయుడు..!

సీఎం చంద్రబాబు విదేశాల్లో చదివే విద్యార్థుల కోసం సంచలన నిర్ణయం