స్త్రీల జీవితంలో పీరియడ్స్ అనేది ఒక సహజమైన ప్రక్రియ. అయినప్పటికీ ఆ సమయంలో కలిగే శారీరక మార్పులు, హార్మోన్ల అసమతుల్యత వల్ల చాలామంది నీరసంగా, ఆందోళనగా ఫీల్ అవుతుంటారు. ఈ సమయంలో శరీరానికి తగినంత విశ్రాంతి ఇవ్వడం ఎంత ముఖ్యమో, పౌష్టికాహారం తీసుకోవడం కూడా అంతే ముఖ్యం. ముఖ్యంగా ఐరన్ ఎక్కువగా ఉండే ఆకుకూరలు, డ్రై ఫ్రూట్స్ మరియు బెల్లం వంటివి తీసుకోవడం వల్ల రక్తహీనత సమస్య రాకుండా ఉంటుంది.
అలాగే శరీరంలో నీటి శాతం తగ్గకుండా చూసుకోవాలి. రోజుకు కనీసం మూడు లీటర్ల నీరు తాగడం వల్ల బాడీ హైడ్రేటెడ్గా ఉండి, కండరాల నొప్పులు తగ్గుతాయి. కాబట్టి ఈ సమయంలో ఆహారం విషయంలో అశ్రద్ధ చేయకుండా మంచి పోషకాలు ఉన్న పదార్థాలు తీసుకోవడం చాలా అవసరం.
పీరియడ్స్ సమయంలో వ్యక్తిగత పరిశుభ్రత పాటించడం వల్ల ఇన్ఫెక్షన్ల బారిన పడకుండా ఉండవచ్చు. ప్రతి ఆరు గంటలకు ఒకసారి ప్యాడ్స్ మార్చడం, జననేంద్రియాలను శుభ్రంగా ఉంచుకోవడం తప్పనిసరి. చాలామంది ఈ సమయంలో వ్యాయామం చేయకూడదని అనుకుంటారు. కానీ తేలికపాటి నడక లేదా యోగా చేయడం వల్ల రక్త ప్రసరణ మెరుగుపడి, పొత్తికడుపు నొప్పి నుంచి ఉపశమనం లభిస్తుంది.
కాఫీ, టీలు మరియు అతిగా వేయించిన మసాలా పదార్థాలను తగ్గించడం వల్ల కడుపు ఉబ్బరం వంటి సమస్యలు తలెత్తవు. రాత్రిపూట కనీసం ఎనిమిది గంటల గాఢ నిద్ర పోవడం వల్ల హార్మోన్లు క్రమబద్ధీకరించబడి, మానసిక ప్రశాంతత లభిస్తుంది. శరీరానికి మరియు మనసుకు తగినంత విశ్రాంతిని ఇస్తూ, ఒత్తిడికి లోనుకాకుండా ఉండటం వల్ల ఈ ఐదు రోజులను ఆరోగ్యంగా గడపవచ్చని నిపుణులు చెబుతున్నారు.
మరిన్ని ఆరోగ్య సూచనలు:
పిల్లల మానసిక ఆరోగ్యానికి ఏఐ ముప్పు..
చలికాలంలో ఆరోగ్య సంరక్షణకు తీసుకోవలసిన జాగ్రత్తలు..!
రక్తహీనతను పోగొట్టే ఔషధం. వెల్లుల్లి!
