సాధారణంగా ప్రభుత్వ అధికారులు జనాభా లెక్కల కోసం ఇంటికి వస్తే మనం సాదరంగా ఆహ్వానిస్తాం. సరిగ్గా ఈ నమ్మకాన్నే స్కామర్లు తమకు అనుకూలంగా మార్చుకుంటున్నారు. ప్రభుత్వ అధికారులమని నమ్మబలుకుతూ, డిజిటల్ సెన్సస్ చేస్తున్నామని చెప్పి మన వ్యక్తిగత వివరాలను సేకరిస్తున్నారు. మన ఇంట్లో ఎంతమంది సభ్యులు ఉన్నారు, వారు ఎక్కడ పని చేస్తారు వంటి ప్రాథమిక వివరాలతో మొదలుపెట్టి, చివరకు మన గుర్తింపు కార్డులను (ఐడి కార్డ్స్) అడిగి వాటిని ఫోటోలు తీసుకుంటున్నారు. ఈ క్రమంలో మన ప్రమేయం లేకుండానే మన డేటాను ఉపయోగించి ఆన్లైన్ ట్రాన్సాక్షన్స్ లేదా లోన్ అప్లికేషన్లు ప్రాసెస్ చేసే ప్రమాదం ఉంది.
ఈ స్కామ్లో అత్యంత ప్రమాదకరమైన ఘట్టం ‘OTP’ అడగడం. వివరాలన్నీ అప్డేట్ కావాలంటే మీ మొబైల్కు వచ్చే అంకెలను చెప్పాలని వారు ఒత్తిడి చేస్తారు. ఒక్కసారి ఆ OTP వారి చేతికి చిక్కితే, మీ బ్యాంక్ అకౌంట్ నుండి డబ్బు మాయమవ్వడమే కాకుండా, మీ డిజిటల్ వాలెట్లు కూడా ఖాళీ అయిపోతాయి. అసలు ఏ ప్రభుత్వ అధికారి కూడా మీ వ్యక్తిగత వివరాలను నమోదు చేయడానికి లేదా సర్వే చేయడానికి మీ ఫోన్కు వచ్చే OTPని అడగరని గుర్తించాలి. కేవలం అంకెలను చెప్పడం వల్ల ఏమవుతుందిలే అని మనం చేసే చిన్న పొరపాటు, మన కష్టార్జితాన్ని క్షణాల్లో ఇతరుల పరం చేస్తుంది.
ఇలాంటి మోసగాళ్ల నుండి తప్పించుకోవడానికి ‘అప్రమత్తత’ ఒక్కటే మార్గం. ఎవరైనా ప్రభుత్వ అధికారులమని చెబితే, ముందుగా వారి అధికారిక గుర్తింపు కార్డును (ID Card) చూపమని అడగాలి. వారు ఇచ్చే సమాధానంలో పొంతన లేకపోయినా, లేదా అనుమానాస్పదంగా ప్రవర్తించినా వెంటనే స్థానిక పోలీసులకు సమాచారం అందిస్తామని హెచ్చరించాలి. మీ వ్యక్తిగత కార్డుల ఒరిజినల్ కాపీలను ఎవరికీ ఇవ్వకూడదు మరియు వాటిని ఫోటోలు తీయనివ్వకూడదు. గుర్తుంచుకోండి, ప్రభుత్వం డిజిటల్ పద్ధతిలో వివరాలు సేకరించినా సరే, మీ రహస్య పాస్వర్డ్స్ లేదా OTPల గురించి ఎప్పుడూ అడగదు. సందేహం ఉంటే మీ వార్డు సెక్రటేరియట్ లేదా సంబంధిత కార్యాలయాన్ని సంప్రదించి నిజానిజాలు తెలుసుకోవాలి.
