వాతావరణ పరిస్థితులు, ఇతర కారణాల వల్ల సీజనల్‌గా వచ్చే వ్యాధులు కొన్ని ఉంటాయి. అయితే ఈ సీజనల్ జబ్బులు రాకుండా అడ్డుకోవాలంటే చాలా కష్టం. కాబట్టి ముందుగానే చర్యలు తీసుకుంటే వాటి నుంచి కొంత వరకు విముక్తి పొందవచ్చు. మార్చి నుంచి మే నెలల్లో వచ్చే అనారోగ్య సమస్యల గురించి ఇప్పుడు తెలుసుకుందాం..!
ఆస్తమా
వేసవిలో పెరిగే వేడి గాలి, తేమ వల్ల ఆస్తమా బాధితులు దగ్గు, శ్వాస తీసుకోవడంలో తీవ్ర ఇబ్బందిని ఎదుర్కొంటారు. కాబట్టి, ఆస్తమా వ్యాధిగ్రస్తులు దీని నుంచి ఉపశమనం పొందాలంటే కొద్దిపాటి చల్లటి వాతావరణం కావాలి. ఈ కాలంలో ఇది సాధ్యపడదు. ఆస్తమా రోగులు దుమ్ముధూళి కారణంగా కూడా ఇబ్బందులు ఎదుర్కొంటారు.
ఆటలమ్మ(పొంగు)
ఈ వైరల్ ఇన్ఫెక్షన్ చిన్న పిల్లల్లో ఎక్కువగా వస్తుంది. ఇది సంక్రమించకుండా పిల్లల్లో 12-15 నెలల్లో ఒకసారి, 4-6 ఏళ్ల మధ్యకాలంలో రెండవసారి వెరిసెల్లా అనే వ్యాక్సిన్ ఇప్పిస్తారు. తలనొప్పి, జ్వరంతో వ్యాధి మొదలై.. సోకిన వారం తర్వాత చర్మంపై చిన్న దద్దుర్లు రావడం వంటి లక్షణాలు కనిపిస్తాయి. అయితే ఇది అంటువ్యాధి. కాబట్టి, శుభ్రత పాటించి, ఇతరులకు దూరంగా ఉండటం ఉత్తమం.
కండ్లకలక
దీని వల్ల కనురెప్పల లోపలి పొర వాపుకు గురవుతుంది. ఎండాకాలంలో వృద్ధి చెందే బాక్టీరియల్ ఇన్ఫెక్షన్, అలర్జీ ప్రతిచర్యల వల్ల అయ్యే గాయాల కారణంగా కండ్లకలక సంభవిస్తుంది. కంటి చుట్టూ కనురెప్పల్లో దురద, నీరు కారడం, ఎర్రబారడం వంటి లక్షణాలు కండ్లకలక వచ్చిన వారిలో గమనించవచ్చు.
ఫ్లూ
వాతావరణ మార్పులు, ఆకస్మిక వర్షాలు, ఉష్ణోగ్రత వేడి పరిస్థితుల్లో ఇన్‌ఫ్లూయెంజా వైరల్ ఫీవర్ సోకుతుంది. దీని కారణంగా దగ్గు, జలుబు వంటి శ్వాసకోశ వ్యాధులు వస్తాయని వైద్యులు చెబుతున్నారు. జ్వరం, కండరాల నొప్పులు, తలనొప్పి వంటివన్నీ ఫ్లూ ఫీవర్ లక్షణాలుగా చెప్పవచ్చు. దీని నుంచి బయటపడటానికి బెడ్‌రెస్ట్, యాంటీవైరల్ మందులు, తగినంత నీటిని తీసుకోవడం మంచిది.
ఫుడ్ పాయిజనింగ్
అన్ని సీజన్లలో కన్నా వేసవిలో ఫుడ్ పాయిజనింగ్ అయ్యే అవకాశాలు ఎక్కువని వైద్య నిపుణులు చెబుతున్నారు. వేసవిలో వెచ్చని వాతావరణ పరిస్థితులలో వృద్ధి చెందే బ్యాక్టీరియా కారణంగా ఆహారం త్వరగా పాడవుతుంది. దీన్ని తీసుకోవడం ద్వారా విరేచనాలు, వాంతులు అవుతాయి. ఇది డీహైడ్రేషన్‌కు దారి తీస్తుంది.
హైపర్థెర్మియా
శరీర ఉష్ణోగ్రత ఉండాల్సిన దానికంటే.. మించి అత్యధికంగా ఉండటాన్ని హైపర్థెర్మియా అంటారు. ఈ పరిస్థితిలో ఉన్న వ్యక్తిలో తలనొప్పి, మైకము, అయోమయం, మూర్ఛ, విపరీతమైన చెమట, తిమ్మిరి వంటి లక్షణాలు కనిపిస్తాయి.
తట్టు
రుబెల్లా వైరస్ కారణంగా వచ్చే తట్టు(మీజిల్స్)లో పొడిదగ్గు, అధికజ్వరం, ముక్కుకారడం, కళ్ళు ఎర్రబడటం వంటి లక్షణాలు కనిపిస్తాయి. ఇది చెవి ఇన్ఫెక్షన్ నుంచి న్యుమోనియాకు కూడా దారితీస్తుంది. స్త్రీలల్లో గర్భధారణ సమస్యను సృష్టిస్తుంది. MMR టీకా(తట్టు, గవదబిళ్లలు, రుబెల్లా) వ్యాధులకు వ్యతిరేకంగా పోరాడటానికి రోగనిరోధక శక్తిని పెంపొందిస్తుంది.
గవదబిళ్లలు
గవదబిళ్ల అనేది పారామిక్సో వైరస్ వల్ల కలిగే ఒక అంటువ్యాధి. ఇది నోటి తుంపర్ల ద్వారా వ్యాపిస్తుంది. పారామిక్సో వైరస్ చెవుల కింద దవడ భాగంలో ఉండే లాలాజల గ్రంథుల చుట్టూ కేంద్రీకృతమై ఉంటాయి. దీని వల్ల లాలాజల గ్రంథులు ఉబ్బుతాయి. చెంపల్లో మంట, నమలడం, మింగడంలో ఇబ్బందిని కలిగిస్తుంది. గవదబిళ్లలు వచ్చిన వ్యక్తిలో జ్వరం, తలనొప్పి, కండరాల నొప్పి వంటి లక్షణాలను గమనించవచ్చు.
రేబిస్
పిల్లులు, కుక్కలు, గబ్బిలాలకు రేబిస్ వైరస్ సోకుతుంది. ఈ వైరస్ బారిన పడిన జంతువులు పరిసరాల్లో తిరిగి వైరస్‌‌ను వ్యాప్తి చేస్తాయి. ఫలితంగా రేబిస్ మనుషులకు కూడా వ్యాపిస్తుంది. పెంపుడు జంతువుల కారణంగా కూడా రేబిస్ సోకుతుంది.
చర్మ సంబంధిత వ్యాధులు
వేసవిలో చర్మాన్ని కాపాడుకోవడం పెద్ద సవాలనే చెప్పాలి. ఎండ తీవ్రత ఎక్కువ ఉండి అతినీల లోహిత(UV) కిరణాలు నేరుగా చర్మంపై పడతాయి. చెమట పొక్కులు, నల్లబడటం వంటివి ఎక్కువగా మిమ్మల్ని ఇబ్బంది పెడతాయి. హాని కలిగించే UV కిరణాలకు ప్రభావితం కాకుండా 30 SPF (సన్ ప్రొటెక్షన్ ఫ్యాక్టర్) ఉన్న క్రీంలు, మాయిశ్చరైజర్‌లు వాడటం మంచిది.
