ఇటీవల అమెరికా, పశ్చిమ దేశాలతో పాటు జర్మనీ, ఇంగ్లాండ్, ఆస్ట్రేలియా వంటి కీలక ఐరోపా దేశాల్లో వలసలపై వ్యతిరేకత తీవ్రస్థాయిలో పెరుగుతోంది. ఈ వలస వ్యతిరేక సెంటిమెంట్ను రాజకీయ పార్టీలు తమ లబ్ది కోసం వాడుకుంటున్నాయి. దీనికి తాజా ఉదాహరణ యూకేలో టామీ రాబిన్సన్ నేతృత్వంలో జరిగిన ఆందోళనలు.
లండన్ వీధుల్లో ఏకంగా లక్ష మందికి పైగా హాజరుకావడం, వారి నినాదాలు, ప్లకార్డులు వలసలపై ప్రజల్లో ఉన్న ఆగ్రహాన్ని స్పష్టంగా చూపాయి. ఈ ఆందోళనలో ఇంగ్లాండ్ సంస్కృతిని, గుర్తింపును రక్షించుకోవాలనే నినాదాలు ప్రధానంగా వినిపించినప్పటికీ, ఇది వలస వ్యతిరేక ప్రదర్శనగా మారింది. ఈ ఆందోళన చాలా వరకు శాంతియుతంగానే ముగిసినప్పటికీ, ప్రత్యర్థి గ్రూపులతో జరిగిన స్వల్ప ఘర్షణలు వలసలపై సమాజంలో ఎంత విభేదం ఉందో తెలియజేస్తున్నాయి. ఈ పెరుగుతున్న వ్యతిరేకత వెనుక అనేక కారణాలు దాగి ఉన్నాయి.
ప్రస్తుతం యూకేలో గృహాలు, వేతనాల కొరత తీవ్రంగా ఉంది. వలసల కారణంగానే ప్రజాసేవల రంగాలపై ఒత్తిడి పెరిగిందని స్థానికుల్లో ఆరోపణలు ఉన్నాయి. దీనితోపాటు, భద్రతాపరమైన కారణాలు కూడా ఈ ఆందోళనలకు ఆజ్యం పోశాయి. వలసదారుల ప్రమేయం ఉన్న కొన్ని నేరాలను భూతద్దంలో చూపించి, తప్పుడు ప్రచారంతో ప్రజలను రెచ్చగొట్టారు. దీంతో స్థానికుల్లోని ఆగ్రహం రాబిన్సన్ ఉద్యమానికి పెద్ద ఎత్తున జనాలను ఆకర్షించింది. ఈ పరిస్థితిని రాజకీయ నాయకులు, ఉద్యమకారులు ఉద్దేశపూర్వకంగానే ఉపయోగించుకున్నారు. వలసలపై ప్రజల్లో ఉన్న భయాలను పెంచి, దాని ద్వారా రాజకీయ లబ్ది పొందాలని వారు భావించారు. సంప్రదాయవాద ఇన్ఫ్లూయెన్సర్లు మరియు కామెంటేటర్లు సోషల్ మీడియాలో వారి సందేశాలను విస్తృతంగా వ్యాప్తి చేశారు.
ఈ ఆందోళనలకు ఆన్లైన్లో జరిగిన తప్పుడు ప్రచారం కూడా తోడైంది. వలసలపై సంచలన ఆరోపణలను ప్రచారంలోకి తీసుకొచ్చి ప్రజలను వీధుల్లోకి వచ్చేలా రెచ్చగొట్టారు. రాజకీయ లబ్ది పొందడానికి మరియు నిరసనలను ఉధృతం చేయడానికి వలసలకు మించిన సున్నితమైన అంశం మరొకటి లేదని వారికి బాగా తెలుసు. ఈ కారణాలన్నింటి వల్ల వలస వ్యతిరేక ఉద్యమం భారీ స్థాయికి చేరుకుంది. ఈ పరిణామాలు యూకేలో వలస విధానంపై చర్చను మరోసారి తెరపైకి తెచ్చాయి. భవిష్యత్తులో ఈ అంశం రాజకీయాల్లో మరింత కీలక పాత్ర పోషిస్తుందని చెప్పవచ్చు.
