బ్రిటన్ కొత్త ప్రధాని ఎవరన్న ఉత్కంఠకు ఎట్టకేలకు తెరపడింది. అధికార లేబర్ పార్టీ నూతన నాయకుడిగా ఆండీ బర్న్హామ్ ఎన్నికయ్యారు. లండన్లో నిర్వహించిన పార్టీ ప్రత్యేక సమావేశంలో ఆయన ఎన్నికను అధికారికంగా ప్రకటించారు. నాయకత్వ పోటీలో బర్న్హామ్కు లేబర్ పార్టీ ఎంపీలు, కార్మిక సంఘాలు, స్థానిక శాఖల నుంచి భారీ మద్దతు లభించింది. దీంతో ఆయన ప్రధానమంత్రి పదవిని చేపట్టేందుకు మార్గం పూర్తిగా సుగమమైంది. వచ్చే సోమవారం కింగ్ ఛార్లెస్-3 బర్న్హామ్ను ఆహ్వానించి కొత్త ప్రభుత్వం ఏర్పాటు చేయాలని కోరనున్నారు. ఆ తర్వాత ఆయన 10 డౌనింగ్ స్ట్రీట్లో బ్రిటన్ ప్రధానిగా బాధ్యతలు స్వీకరిస్తారు. ఇటీవల కీర్ స్టార్మర్ ప్రధాని పదవితో పాటు లేబర్ పార్టీ నాయకత్వానికి రాజీనామా చేశారు. పార్టీలో పెరిగిన అసంతృప్తి, స్థానిక ఎన్నికల్లో ఎదురైన నిరాశాజనక ఫలితాల నేపథ్యంలో ఆయన ఈ నిర్ణయం తీసుకున్నారు. దీంతో కొత్త నాయకుడిని ఎన్నుకోవాల్సిన పరిస్థితి ఏర్పడగా.. ఆండీ బర్న్హామ్ ఆ అవకాశాన్ని అందిపుచ్చుకున్నారు.
ఆండీ బర్న్హామ్ పూర్తి పేరు ఆండ్రూ ముర్రే బర్న్హామ్. ఆయన 1970 జనవరి 7న వాయువ్య ఇంగ్లాండ్లోని మెర్సీసైడ్ ప్రాంతంలో జన్మించారు. చిన్న వయసులోనే రాజకీయాలపై ఆసక్తి పెంచుకున్న బర్న్హామ్.. ఆ తర్వాత లేబర్ పార్టీలో చేరి తన రాజకీయ ప్రయాణాన్ని ప్రారంభించారు. 2001లో తొలిసారిగా పార్లమెంటు సభ్యుడిగా ఎన్నికైన ఆయన 2017 వరకు ఎంపీగా కొనసాగారు. మాజీ ప్రధాని గార్డన్ బ్రౌన్ ప్రభుత్వంలోనూ కీలక బాధ్యతలు నిర్వహించారు. ట్రెజరీ ప్రధాన కార్యదర్శిగా, సాంస్కృతిక శాఖ మంత్రిగా, ఆరోగ్య శాఖ మంత్రిగా పనిచేసి పాలనపై మంచి అనుభవాన్ని సంపాదించారు. ప్రజా ఆరోగ్యం, గృహ నిర్మాణం, రవాణా సౌకర్యాలు వంటి అంశాలపై బలంగా మాట్లాడే నాయకుడిగా గుర్తింపు తెచ్చుకున్నారు. సాధారణ ప్రజలకు అర్థమయ్యేలా మాట్లాడటం, లండన్ వెలుపల ఉన్న ప్రాంతాల సమస్యలను గట్టిగా వినిపించడం బర్న్హామ్కు ప్రత్యేక గుర్తింపును తీసుకొచ్చాయి.
లేబర్ పార్టీ నాయకత్వం కోసం బర్న్హామ్ గతంలోనే రెండుసార్లు ప్రయత్నించారు. 2010లో తొలిసారి, 2015లో రెండోసారి పార్టీ నాయకత్వ ఎన్నికల్లో పోటీ చేసినప్పటికీ విజయం సాధించలేకపోయారు. ఆ తర్వాత జాతీయ రాజకీయాలకు కొంతకాలం దూరంగా వెళ్లిన ఆయన 2017లో గ్రేటర్ మాంచెస్టర్ మేయర్గా ఎన్నికయ్యారు. అక్కడ ప్రజా రవాణా, గృహ వసతి, నిరాశ్రయుల సమస్యలు, ప్రాంతీయ అభివృద్ధి వంటి అంశాలపై తీసుకున్న నిర్ణయాలతో ప్రజల్లో మంచి ఆదరణ పొందారు. ముఖ్యంగా బ్రిటన్లో అధికారమంతా లండన్కే పరిమితం కాకుండా ఇతర ప్రాంతాలకు కూడా వెళ్లాలని ఆయన ఎప్పటినుంచో వాదిస్తున్నారు. ఈ కారణంగానే బర్న్హామ్ను ఆయన అభిమానులు ‘కింగ్ ఆఫ్ ది నార్త్’ అని పిలుస్తుంటారు. మేయర్గా వరుస విజయాలు సాధించిన ఆయన.. దేశ రాజకీయాల్లో మరోసారి కీలక పాత్ర పోషించాలనే ఉద్దేశంతో పార్లమెంటు వైపు అడుగులు వేశారు. చివరకు తన చిరకాల ప్రధానమంత్రి కలను సాకారం చేసుకునే స్థాయికి చేరుకున్నారు.
ఇటీవల జరిగిన మేకర్ఫీల్డ్ ఉప ఎన్నికల్లో ఆండీ బర్న్హామ్ ఘన విజయం సాధించి మరోసారి పార్లమెంటులో అడుగుపెట్టారు. ఈ గెలుపుతో లేబర్ పార్టీ నాయకత్వానికి పోటీ చేయడానికి ఆయనకు మార్గం సుగమమైంది. అప్పటికే కీర్ స్టార్మర్ నాయకత్వంపై పార్టీలో అసంతృప్తి పెరగడం, పలువురు ఎంపీలు మార్పు కోరుకోవడం బర్న్హామ్కు కలిసొచ్చింది. చివరకు పార్టీ నాయకుడిగా ఎన్నికైన ఆయన.. ఇప్పుడు బ్రిటన్ ప్రధానిగా బాధ్యతలు చేపట్టబోతున్నారు. ప్రస్తుతం బ్రిటన్లో లేబర్ పార్టీకి పార్లమెంటులో మెజారిటీ ఉంది. అందువల్ల ఆ పార్టీ నాయకుడిగా ఎన్నికైన వ్యక్తి సాధారణ ఎన్నికలు లేకుండానే ప్రధానమంత్రి పదవిని చేపట్టవచ్చు. అయితే దేశంలో పెరిగిన జీవన వ్యయం, ఆరోగ్య సేవల సమస్యలు, గృహాల కొరత, ఆర్థిక ఒత్తిళ్లు బర్న్హామ్ ముందున్న ప్రధాన సవాళ్లు. ప్రజల్లో మళ్లీ నమ్మకాన్ని తీసుకొచ్చి, బ్రిటన్ను అభివృద్ధి దిశగా నడిపిస్తానని ఆయన హామీ ఇచ్చారు.
