మనీ ట్రాన్స్‌ఫర్ చేస్తున్నారా? ఇకపై గంట ఆగాల్సిందే..ఆర్బీఐ కొత్త నిబంధన ఇదే!

మనీ ట్రాన్స్‌ఫర్ చేస్తున్నారా? ఇకపై గంట ఆగాల్సిందే.. ఆర్బీఐ కొత్త నిబంధన డిజిటల్ చెల్లింపుల రంగంలో పెరుగుతున్న సైబర్ మోసాలకు అడ్డుకట్ట వేయడానికి రిజర్వ్ బ్యాంక్ ఆఫ్ ఇండియా (RBI) ‘గోల్డెన్ అవర్’ (Golden Hour) అనే విప్లవాత్మక నిబంధనను తీసుకువస్తోంది. ప్రస్తుతం యూపీఐ (UPI) లావాదేవీలు క్షణాల్లో జరిగిపోతుండటం వల్ల, ఎవరైనా పొరపాటున లేదా మోసగాళ్ల ట్రాప్‌లో పడి డబ్బులు పంపితే, వాటిని వెనక్కి తెచ్చుకోవడం అసాధ్యంగా మారింది.

ఆర్బీఐ కొత్త నిబంధన మనీ ట్రాన్స్‌ఫర్ ఎలా పనిచేస్తుంది

ఈ వేగాన్నే సైబర్ నేరగాళ్లు తమకు అనుకూలంగా మార్చుకుని బ్యాంక్ ఖాతాలను ఖాళీ చేస్తున్నారు. దీనిని నివారించడానికి, ఇకపై రూ. 10,000 కంటే ఎక్కువ మొత్తంలో జరిపే కొత్త లావాదేవీల మీద ఒక గంట కాలం పాటు ‘హోల్డ్’ పీరియడ్‌ను విధించాలని ఆర్బీఐ ప్రతిపాదిస్తోంది. దీనివల్ల లావాదేవీ జరిగిన వెంటనే డబ్బులు అవతలి వ్యక్తి ఖాతాలో పడకుండా కొంత సమయం పడుతుంది, ఈ లోపు బాధితులు తాము మోసపోయామని గుర్తిస్తే ఆ ట్రాన్సాక్షన్‌ను నిలిపివేసే అవకాశం ఉంటుంది.

గోల్డెన్ అవర్ రూల్ ప్రయోజనాలు…

ఈ గంట విరామం వెనుక ఉన్న ప్రధాన ఉద్దేశ్యం సైబర్ నేరగాళ్ల నెట్‌వర్క్‌ను దెబ్బతీయడమే. సాధారణంగా మోసం జరిగిన వెంటనే బాధితుడు తేరుకునే లోపే డబ్బులు పది ఖాతాలు మారిపోతుంటాయి. ఈ ‘గోల్డెన్ అవర్’ రూల్ వల్ల బాధితులకు తమ తప్పును సరిదిద్దుకోవడానికి లేదా మోసాన్ని గుర్తించి బ్యాంకును అలర్ట్ చేయడానికి 60 నిమిషాల విలువైన సమయం దొరుకుతుంది. అయితే, ఈ నిబంధన వల్ల సాధారణ వినియోగదారులకు పెద్దగా ఇబ్బంది కలగదు. మీరు రోజూ చేసే రీఛార్జ్‌లు, కరెంట్ బిల్లులు, లేదా మీ కాంటాక్ట్ లిస్ట్‌లో ఉండి ఇప్పటికే లావాదేవీలు చేసిన వ్యక్తులకు పంపే డబ్బుకు ఈ గంట సమయం వర్తించదు. కేవలం మొదటిసారి ఒక అపరిచిత వ్యక్తికి లేదా కొత్త ఖాతాకు పెద్ద మొత్తంలో (₹10k+) డబ్బు పంపినప్పుడు మాత్రమే ఈ నిబంధన అమలులోకి వస్తుంది.

సైబర్ క్రైమ్ నియంత్రణలో కొత్త అడుగు…

సైబర్ క్రైమ్ బాధితులు తమ ఖాతా నుండి డబ్బు కట్ అయిన 15-20 నిమిషాల తర్వాతే విషయాన్ని గ్రహిస్తుంటారని గణాంకాలు చెబుతున్నాయి. ఆర్బీఐ తీసుకువస్తున్న ఈ కొత్త ఆయుధం పోలీసులకు, బ్యాంకింగ్ వ్యవస్థకు నేరగాళ్లను పట్టుకోవడంలో ఒక బలమైన రక్షణ కవచంలా మారుతుంది. ప్రస్తుతం ఈ ప్రతిపాదన ప్రయోగ దశలో ఉంది. మే 8 వరకు దీనిపై ప్రజాభిప్రాయ సేకరణ జరగనుంది. ఇది పూర్తిస్థాయిలో అమల్లోకి వస్తే, డిజిటల్ ఇండియాలో సామాన్యుడి సొమ్ముకు మరింత భద్రత లభిస్తుంది. ‘క్లిక్ – వెయిట్ – వెరిఫై – డన్’ అనే కొత్త సూత్రంతో సైబర్ కేటుగాళ్ల పీడ విరగడై, భయం లేని డిజిటల్ లావాదేవీల కొత్త శకం మొదలవుతుందని ఆశించవచ్చు.

ఇతర కథనాలు:

డిజిటల్ స్కామ్ నుంచితప్పించుకోండిలా.!

డిజిటల్ అరెస్ట్ అలర్ట్..! జర జాగ్రత్త..