చాలా మందికి జ్వరం వచ్చినప్పుడు స్నానం చేయాలా వద్దా అనే డౌట్ ఉంటుంది. “అయ్యో, జ్వరం ఉంది కదా.. స్నానం చేస్తే ఇంకా పెరుగుతుందేమో” అని కొంతమంది భయపడతారు. ఇంకొంతమంది మాత్రం, “ఫ్రెష్‌గా ఉంటేనే కదా మంచిది” అని అనుకుంటారు. అసలు డాక్టర్లు ఏం చెబుతున్నారో ఇప్పుడు చూద్దాం.
గోరువెచ్చని నీటితో స్నానం మంచిదే!
డాక్టర్లు చెప్పేదేంటంటే, గోరువెచ్చని నీటితో తేలికగా స్నానం చేస్తే శరీరానికి చాలా రిలీఫ్‌గా అనిపిస్తుంది. జ్వరం వచ్చినప్పుడు మన శరీరం వేడిగా ఉంటుంది, అలిసిపోయినట్లు కూడా ఉంటుంది. ఇలాంటి టైంలో గోరువెచ్చని నీటి స్నానం చేస్తే, ఒంట్లో ఉన్న వేడి కొంచెం తగ్గుతుంది. అంతేకాదు, అలసట తగ్గిపోయి, మనసు కూడా కాస్త తేలికపడుతుంది. మీకు తెలుసు కదా, జ్వరం వచ్చినప్పుడు మనం ఎంత చిరాకుగా, అసౌకర్యంగా ఫీల్ అవుతామో! అలాంటి టైంలో ఓ గోరువెచ్చని స్నానం మనసుకి కూడా కాస్త ప్రశాంతతనిస్తుంది.
జ్వరం ఎక్కువగా ఉంటే ఏం చేయాలి?
అయితే, కొన్నిసార్లు జ్వరం చాలా ఎక్కువగా ఉంటుంది. ఒంట్లో శక్తి అస్సలు ఉండదు, చాలా బలహీనంగా అనిపిస్తుంది. అలాంటి పరిస్థితుల్లో, పూర్తిగా స్నానం చేయకుండా ఉండటమే మంచిదని డాక్టర్లు సలహా ఇస్తున్నారు. బదులుగా.. ఒక తడి వస్త్రంతో శరీరాన్ని తుడుచుకోవచ్చు. ఇలా చేయడం వల్ల ఒళ్ళు శుభ్రంగా ఉంటుంది, కొద్దిగా వేడి కూడా తగ్గుతుంది.
చిన్న పిల్లల విషయంలో జాగ్రత్త!
చిన్న పిల్లలకి జ్వరం వచ్చినప్పుడు కూడా ఇదే పద్ధతిని పాటించొచ్చు. గోరువెచ్చని నీటితో తడిపిన మెత్తటి గుడ్డతో వాళ్ళ శరీరాన్ని సున్నితంగా తుడవాలి. వాళ్ళని శుభ్రంగా ఉంచడం చాలా ముఖ్యం. దీనివల్ల వాళ్ళకి కూడా కాస్త రిలీఫ్‌గా ఉంటుంది.
మొత్తం మీద చెప్పాలంటే, జ్వరం వచ్చినప్పుడు స్నానం చేయాలా వద్దా అనేది మీ పరిస్థితిపై ఆధారపడి ఉంటుంది. మీకు బాగా నీరసంగా లేకపోతే, గోరువెచ్చని నీటితో తేలికగా స్నానం చేయడం వల్ల శరీరం, మనసు రెండూ రిలాక్స్ అవుతాయి. కానీ, జ్వరం చాలా ఎక్కువగా ఉండి, ఒంట్లో అస్సలు శక్తి లేకపోతే, తడి గుడ్డతో తుడుచుకోవడమే మంచిది. ఏదేమైనా, మీకు ఏదైనా సందేహం ఉంటే లేదా మీ పరిస్థితి తీవ్రంగా అనిపిస్తే, డాక్టర్‌ని సంప్రదించడం ఎప్పుడూ మంచిదే!
