భారతీయులకు గుడ్ న్యూస్:లక్ష డాలర్ల వీసా ఫీజు రద్దు చేసిన కోర్టు. అమెరికా కంపెనీలకు పెద్ద రిలీఫ్

మన దేశంలో చదువుకున్న చాలా మంది అన్నలు, అక్కలు అమెరికా వెళ్లి సాఫ్ట్‌వేర్ ఉద్యోగాలు చేయాలని కలలుకంటూ ఉంటారు కదా? అలా విదేశీయులు అమెరికా వెళ్లి ఉద్యోగం చేయాలంటే అక్కడి ప్రభుత్వం ‘హెచ్‌-1బీ వీసా’ అనే ఒక స్పెషల్ పర్మిషన్ (పాస్) ఇవ్వాలి. అమెరికా దేశం ఏటా ఇలాంటివి 85 వేల వీసాలు ఇస్తుంది. మనవాళ్లు చాలా టాలెంటెడ్‌ కాబట్టి, ఆ వీసాలు పొందేవాళ్లలో 70 శాతం మంది మన భారతీయులే ఉంటారు. సాధారణంగా ఈ వీసా కోసం అయ్యే ఖర్చును వాళ్లను ఉద్యోగంలో పెట్టుకునే అమెరికా కంపెనీలే భరిస్తాయి. అయితే, అమెరికా అధ్యక్షుడు ట్రంప్ బాబాయ్ కి ఒక ఆలోచన వచ్చింది. విదేశీయులు కాకుండా అమెరికా వాళ్లకే ఉద్యోగాలు రావాలనే పట్టుదలతో, గతేడాది సెప్టెంబరులో ఈ వీసా ఫీజును ఏకంగా లక్ష డాలర్లకు (మన దేశ డబ్బుల్లో దాదాపు 85 లక్షల రూపాయలు) పెంచేశాడు. ఇంత పెద్ద మొత్తాన్ని భరించలేక చాలా కంపెనీలు మన దేశం వాళ్లను ఉద్యోగాల్లోకి తీసుకోవడం తగ్గించేశాయి. దీనివల్ల మనవాళ్లకు ఉద్యోగాలు రావడం కష్టమైపోయింది.

కోర్టు ఇచ్చిన తీర్పు ఏంటి? కంపెనీలకు ఎలా ఊరట లభించింది?

ఈ విపరీతమైన ఫీజు పెంచడాన్ని తట్టుకోలేక కొందరు అమెరికాలోని బోస్టన్ ఫెడరల్ కోర్టుకు వెళ్లి కేసు వేశారు. దీనిపై విచారణ జరిపిన కోర్టు ఒక సూపర్ తీర్పు చెప్పింది. అమెరికా పార్లమెంట్ (కాంగ్రెస్) అనుమతి లేకుండా ట్రంప్ ప్రభుత్వం సొంతంగా ఇలా లక్ష డాలర్ల ఫీజు పెట్టడం చట్టవిరుద్ధం అని కోర్టు తేల్చేసింది. ఈ ఫీజు అసలు చెల్లదు అని కొట్టేసింది. ఈ తీర్పుతో అమెరికా కంపెనీలకు ఒక్కసారిగా ప్రాణం లేచొచ్చినట్లయ్యింది. ఎందుకంటే లక్ష డాలర్ల భారీ భారం ప్రస్తుతానికి తప్పిపోయింది. ఈ మంచి వార్తతో ప్రవాస భారతీయులు, డెమోక్రాట్లతో పాటు ట్రంప్ సొంత పార్టీ నేతలు కూడా చాలా హ్యాపీగా ఫీల్ అవుతున్నారు. అయితే వైట్‌హౌస్ (ట్రంప్ ప్రభుత్వం) మాత్రం ఈ తీర్పుపై పైకోర్టుకు వెళ్తామని అంటోంది. ఒకవేళ వాళ్లు అప్పీల్‌కు వెళ్తే ఈ గొడవ కోర్టుల్లో మరికొన్ని నెలల పాటు సాగే అవకాశం ఉంది. గతంలో కూడా ఇలాగే కింద కోర్టు తీర్పును ట్రంప్ ప్రభుత్వం పైకోర్టులో గెలిచిన దాఖలాలు ఉన్నాయి కాబట్టి, ఈ ఫీజు భారం పూర్తిగా పోయినట్లేనని ఇప్పుడే నమ్మలేము.

దీనివల్ల మన భారతీయులకు వచ్చే లాభం ఏంటి?

మరి ఈ కోర్టు తీర్పు వల్ల మనవాళ్లకు వచ్చే లాభం ఏంటో తెలుసా? ఈ తీర్పు రాగానే ఏటా ఇచ్చే వీసాల సంఖ్యేం పెరిగిపోదు, అలాగని అందరికీ వీసాలు వచ్చేస్తాయనే గ్యారెంటీ కూడా లేదు. కానీ, ఒక పెద్ద లాభం ఏంటంటే.. ఫీజు భారం తగ్గింది కాబట్టి, అమెరికా కంపెనీలు మళ్లీ ధైర్యంగా విదేశీయులను ఉద్యోగాల్లోకి తీసుకోవడం స్టార్ట్ చేస్తాయి. ప్రస్తుతం అమెరికాలో మంచి నైపుణ్యం ఉన్న సాఫ్ట్‌వేర్ ఉద్యోగుల కొరత చాలా ఉంది. కంపెనీలు రిక్రూట్‌మెంట్‌ పెంచితే, ఎప్పటిలాగే టాలెంట్ ఉన్న మన భారతీయులకే ఎక్కువ అవకాశాలు దక్కుతాయి. అందుకే ఈ కోర్టు తీర్పు మన అన్నలకు, అక్కలకు ఒక పెద్ద ఉపశమనం లాంటిదని, దీనివల్ల మనవాళ్లకు అమెరికా ఉద్యోగాల్లో మళ్లీ మంచి ఛాన్సులు వస్తాయని వృత్తి నిపుణులు చెప్తున్నారు.