మేఘాల మధ్య టీ తోటల అందాలు.. వాల్పరై ట్రిప్ ప్లాన్ ఇలా చేసుకోండి

చుట్టూ కనుచూపు మేర పచ్చని టీ తోటలు.. వాటి మధ్య నుంచి మెలికలు తిరిగే రహదారులు.. కొండలను తాకుతూ వెళ్లే మేఘాలు.. దారిపొడవునా జలపాతాలు, అడవుల్లో స్వేచ్ఛగా తిరిగే అరుదైన జంతువులు. ఈ అందాలన్నీ ఒకేచోట చూడాలంటే తమిళనాడులోని వాల్పరై వెళ్లాల్సిందే. ఊటీ, కొడైకెనాల్‌లా జనసందోహం లేకుండా ప్రకృతితో ప్రశాంతంగా గడపాలనుకునేవారికి ఇది సరైన ప్రదేశం. పొల్లాచ్చి నుంచి వాల్పరై వెళ్లే మార్గంలో ఎదురయ్యే 40 మలుపులు, అలియార్ జలాశయం అందాలు ప్రయాణాన్నే ఓ మధుర జ్ఞాపకంగా మార్చేస్తాయి. ఒక్కసారి ఇక్కడ అడుగుపెడితే తిరిగి రావాలనిపించని వాల్పరైకి ఎలా వెళ్లాలి? ఎక్కడెక్కడ తిరగాలి? ఎంత ఖర్చవుతుందో ఇప్పుడు తెలుసుకుందాం.

సముద్ర మట్టానికి సుమారు 3,500 అడుగుల ఎత్తులో ఉన్న వాల్పరై తమిళనాడులోని కోయంబత్తూరు జిల్లాలో ఉంది. పశ్చిమ కనుమల్లోని అన్నామలై కొండల మధ్య విస్తరించిన ఈ ప్రాంతం టీ, కాఫీ తోటలు, దట్టమైన అడవులు, జలపాతాలు, అరుదైన వన్యప్రాణులకు ప్రసిద్ధి. అదృష్టం ఉంటే దారిలో సింహపు తోక కోతులు, నీలగిరి లంగూర్లు, జింకలు, అడవి ఏనుగులు కూడా కనిపించవచ్చు.

వాల్పరై ట్రిప్ ప్లాన్ వివరాలు

వాల్పరైలోని ముఖ్యమైన ప్రదేశాలను ప్రశాంతంగా చూడాలంటే కనీసం రెండు నుంచి మూడు రోజులు కేటాయించాలి. ఆగస్టు నుంచి డిసెంబర్ వరకు వాతావరణం ఆహ్లాదకరంగా ఉండటంతో పర్యటనకు అనుకూలమైన సమయం. మార్చి నుంచి మే వరకు కూడా వెళ్లవచ్చు. వర్షాకాలంలో వాల్పరై మరింత పచ్చగా కనిపించినప్పటికీ భారీ వర్షాలు, పొగమంచు, జారే ఘాట్ రోడ్ల వల్ల ప్రయాణంలో జాగ్రత్తలు అవసరం.

హైదరాబాద్ నుంచి వాల్పరై ఎలా వెళ్లాలి?

హైదరాబాద్ నుంచి వాల్పరైకి రోడ్డు దూరం సుమారు 950 నుంచి 1,000 కిలోమీటర్లు. కోయంబత్తూరు లేదా పొల్లాచ్చి చేరుకొని అక్కడి నుంచి రోడ్డు మార్గంలో వాల్పరై వెళ్లడం సులభమైన మార్గం.

విమాన మార్గం: హైదరాబాద్ నుంచి కోయంబత్తూరు విమానాశ్రయానికి చేరుకోవాలి. కోయంబత్తూరు నుంచి వాల్పరై సుమారు 110 కిలోమీటర్లు ఉంటుంది. అక్కడి నుంచి పొల్లాచ్చి మీదుగా బస్సు లేదా టాక్సీలో మూడు నుంచి నాలుగు గంటల్లో చేరుకోవచ్చు.

రైలు మార్గం: హైదరాబాద్ లేదా సికింద్రాబాద్ నుంచి కోయంబత్తూరుకు రైలులో వెళ్లాలి. అక్కడి నుంచి పొల్లాచ్చి చేరుకొని ప్రభుత్వ బస్సు లేదా టాక్సీలో వాల్పరై వెళ్లవచ్చు. వాల్పరైకి సమీప రైల్వే స్టేషన్ పొల్లాచ్చి. అక్కడి నుంచి దూరం సుమారు 65 కిలోమీటర్లు.

రోడ్డు మార్గం: సొంత కారు లేదా బైక్‌పై వెళ్లేవారు హైదరాబాద్-బెంగళూరు-సేలం-కోయంబత్తూరు-పొల్లాచ్చి మార్గాన్ని ఎంచుకోవచ్చు. పొల్లాచ్చి నుంచి అలియార్ మీదుగా 40 ఘాట్ మలుపులు దాటుతూ వాల్పరై చేరుకోవాలి. సొంత వాహనంలో వెళ్లేవారు ముందుగా ఉచిత ఈ-పాస్ తీసుకోవాలి.

వాల్పరైలో చూడాల్సిన ప్రముఖ ప్రదేశాలు

అలియార్ డ్యామ్: పొల్లాచ్చి నుంచి వాల్పరై వెళ్లే మార్గంలో కనిపించే మొదటి ప్రధాన ఆకర్షణ. కొండల మధ్య విస్తరించిన జలాశయం, ఉద్యానవనం పర్యాటకులను ఆకట్టుకుంటాయి.

మంకీ ఫాల్స్: అలియార్ డ్యామ్‌కు సమీపంలో ఉన్న అందమైన జలపాతం. వర్షాల తర్వాత నీటి ప్రవాహం ఎక్కువగా ఉండే సమయంలో మరింత ఆకర్షణీయంగా కనిపిస్తుంది. రాళ్లు జారే ప్రమాదం ఉండటంతో జాగ్రత్తగా ఉండాలి.

లోమ్స్ వ్యూ పాయింట్: వాల్పరై ఘాట్ రోడ్డులోని అత్యంత అందమైన ప్రదేశాల్లో ఇది ఒకటి. ఇక్కడి నుంచి అలియార్ జలాశయం, పొల్లాచ్చి మైదానాలు, మెలికలు తిరిగిన ఘాట్ రోడ్డు స్పష్టంగా కనిపిస్తాయి.

నల్లముడి పూంజోలై: టీ తోటల మధ్య నుంచి కొంతదూరం నడిచి చేరుకోవాల్సిన అద్భుతమైన వ్యూ పాయింట్. ఇక్కడి నుంచి పచ్చని లోయలు, జలపాతాలు, పొగమంచుతో కప్పుకున్న కొండలు కనిపిస్తాయి.

షోలయార్ డ్యామ్: వాల్పరై సమీపంలోని ప్రధాన జలాశయాల్లో ఇది ఒకటి. వర్షాకాలం తర్వాత నిండుగా ఉన్న జలాశయం, చుట్టూ దట్టమైన అడవి అద్భుతంగా కనిపిస్తాయి.

చిన్నకల్లార్ జలపాతం: అధిక వర్షపాతం నమోదయ్యే ప్రాంతాల్లో చిన్నకల్లార్ ఒకటి. దట్టమైన అడవి, పొగమంచు, ప్రవహించే జలపాతం ఈ ప్రాంతానికి ప్రత్యేక ఆకర్షణ. అటవీశాఖ అనుమతించిన సమయంలోనే సందర్శించాలి.

టీ తోటలు: వాల్పరైకి అసలైన అందం ఇక్కడి టీ తోటలే. పచ్చని కొండలపై వరుసగా విస్తరించిన తోటల మధ్య ప్రయాణించడం, ఉదయాన్నే పొగమంచులో వాటిని చూడటం మరచిపోలేని అనుభూతిని అందిస్తుంది.

ఒకరికి.వాల్పరై ట్రిప్ బడ్జెట్ ఎంత?

ప్రయాణ ఖర్చు: హైదరాబాద్ నుంచి కోయంబత్తూరు వరకు రైలు, అక్కడి నుంచి బస్సులో వాల్పరై చేరుకుంటే రాకపోకలకు సుమారు రూ.3,000 నుంచి రూ.6,000 వరకు ఖర్చవుతుంది. విమానంలో ప్రయాణిస్తే టికెట్ ధరను బట్టి రూ.8,000 నుంచి రూ.15,000 వరకు కావచ్చు.

వసతి: వాల్పరైలో సాధారణ హోటళ్లు, హోమ్‌స్టేలు రోజుకు రూ.1,000 నుంచి రూ.2,500 వరకు లభిస్తాయి. టీ తోటల మధ్య ఉండే బంగ్లాలు, రిసార్టుల ధరలు రూ.3,000కు పైగా ఉండవచ్చు.

ఆహారం: సాధారణ హోటళ్లలో ఇడ్లీ, దోశ, పొంగల్, అన్నం వంటి దక్షిణ భారత వంటకాలు లభిస్తాయి. ఒకరికి రోజుకు రూ.500 నుంచి రూ.900 వరకు కేటాయిస్తే సరిపోతుంది.

స్థానిక ప్రయాణం: బస్సులను ఉపయోగిస్తే ఖర్చు తక్కువగా ఉంటుంది. టాక్సీ లేదా స్థానిక వాహనాన్ని అద్దెకు తీసుకుంటే రోజుకు సుమారు రూ.2,000 నుంచి రూ.4,000 వరకు కావచ్చు. మొత్తంగా మూడు రోజుల వాల్పరై పర్యటనకు ఒకరికి రూ.8,000 నుంచి రూ.18,000 వరకు ఖర్చవుతుంది. విమాన ప్రయాణం, మంచి రిసార్ట్ ఎంచుకుంటే బడ్జెట్ రూ.20,000 దాటవచ్చు.

వాల్పరై అటవీ ప్రాంతం కావడంతో రాత్రివేళ ఘాట్ రోడ్డుపై ప్రయాణించకపోవడం మంచిది. వన్యప్రాణులు కనిపించినప్పుడు వాహనం నుంచి దిగడం, వాటికి ఆహారం ఇవ్వడం, పెద్ద శబ్దాలు చేయడం ప్రమాదకరం. ప్లాస్టిక్ వస్తువులను అడవుల్లో పడేయకుండా ప్రకృతి అందాలను బాధ్యతగా ఆస్వాదించాలి.