ఆంధ్రప్రదేశ్లో కూటమి ప్రభుత్వం ఏర్పడి విజయవంతంగా రెండేళ్లు పూర్తి చేసుకుంది. ఈ సందర్భంగా తిరుపతి దగ్గరలోని దామినేడులో ‘రెండేళ్ల నమ్మకం, అభివృద్ధి, సంక్షేమం’ పేరుతో ఒక భారీ బహిరంగ సభను నిర్వహించారు. ఈ సభలో ముఖ్యమంత్రి చంద్రబాబు నాయుడు, డిప్యూటీ సీఎం పవన్ కళ్యాణ్, మంత్రి లోకేష్తో పాటు కూటమికి చెందిన ముఖ్యాతిముఖ్యులు పాల్గొన్నారు. సభలో చంద్రబాబు మాట్లాడుతూ.. తన రాజకీయ ప్రస్థానం మొదలైన తిరుపతి గడ్డపైనే, నాలుగోసారి సీఎంగా ప్రమాణస్వీకారం చేసి రెండేళ్లు కావడం తనకు ఎంతో సంతోషాన్ని ఇస్తోందన్నారు. రాష్ట్రాన్ని కాపాడుకోవడం కోసమే 2024 ఎన్నికల్లో మోదీ, పవన్, తాను చేతులు కలిపామని, ప్రజలు తమను నమ్మి చారిత్రాత్మక విజయాన్ని అందించారని ఆయన గుర్తుచేసుకున్నారు.
గత ప్రభుత్వ తాకట్టు రాజకీయాలు.. వ్యవస్థల విధ్వంసంపై ధ్వజం
గత ప్రభుత్వ పాలనపై ముఖ్యమంత్రి తీవ్రస్థాయిలో విమర్శలు గుప్పించారు. నాటి ప్రభుత్వం ఏకంగా ఎమ్మార్వో ఆఫీసులను, ప్రభుత్వ ఆసుపత్రులను కూడా తాకట్టు పెట్టేసిందని, అన్నీ తాకట్టు పెట్టిన వాళ్లకు ఇప్పుడు రాష్ట్రం గురించి మాట్లాడే అర్హతే లేదని మండిపడ్డారు. 2019లో ప్రజావేదిక కూల్చివేతతో మొదలైన నాటి విధ్వంసం వల్ల రాష్ట్రంలోని అన్ని వ్యవస్థలు దెబ్బతిన్నాయని ఆవేదన వ్యక్తం చేశారు. తప్పుడు కేసులు పెట్టి తనను 53 రోజులు జైల్లో పెట్టారని, పవన్ కళ్యాణ్ను కూడా అడుగడుగునా వేధించారని బాబు చెప్పారు. మూడు రాజధానుల పేరుతో నాటి పాలకులు ప్రజల మధ్య చిచ్చు పెట్టారని, వారి వేధింపులు భరించలేకే పారిశ్రామికవేత్తలు రాష్ట్రం విడిచి వెళ్లిపోయారని విమర్శించారు. విభజన వల్ల జరిగిన నష్టం కంటే, గత ప్రభుత్వ తుగ్లక్ నిర్ణయాల వల్లే ఏపీ ఎక్కువగా నష్టపోయిందని స్పష్టం చేశారు.
వెంటిలేటర్పై ఉన్న ఏపీకి కేంద్రం అండ.. అభివృద్ధి బాటలో ప్రాజెక్టులు
ఆర్థికంగా కుప్పకూలిపోయి, వెంటిలేటర్పై ఉన్న ఆంధ్రప్రదేశ్కు కేంద్ర ప్రభుత్వం ఆక్సిజన్ ఇచ్చి బతికించిందని చంద్రబాబు కొనియాడారు. డబుల్ ఇంజిన్ సర్కార్ వల్ల రాష్ట్రానికి జరుగుతున్న ప్రయోజనాలు ఇప్పుడిప్పుడే కళ్లముందు కనిపిస్తున్నాయన్నారు. పోలవరం ప్రాజెక్ట్, రాజధాని అమరావతి, విశాఖ స్టీల్ ప్లాంట్, వైజాగ్ రైల్వే జోన్ వంటి కీలకమైన విషయాల్లో ప్రధాని నరేంద్ర మోదీ ప్రభుత్వం మనకు కొండంత అండగా నిలిచిందని చెప్పారు. ప్రధాని మోదీ ఓటమి ఎరుగని నాయకుడని, ఆయన 12 ఏళ్ల పాలనలో దేశాన్ని ప్రపంచంలోనే అగ్రస్థానంలో నిలిపారని అభినందించారు. ఎంత ఆర్థిక ఇబ్బందులు ఉన్నప్పటికీ ఇచ్చిన ప్రతీ హామీని నెరవేరుస్తున్నామని, ఇప్పటికే కుప్పానికి నీళ్లు తెచ్చామని.. ఈ ఏడాది కల్యాణి డ్యామ్ పూర్తి చేసి శ్రీశైలం మల్లన్నను, తిరుపతి వెంకన్నను నీటితో కలుపుతామని హామీ ఇచ్చారు.
సంపద సృష్టిస్తేనే సంక్షేమం.. పీ4 ముగింపుతో సరికొత్త ప్రయాణం
కేవలం అప్పులు తెచ్చి పంచడం కాదు, రాష్ట్రంలో సంపదను సృష్టిస్తేనే సంక్షేమాన్ని ప్రజలకు సరిగ్గా పంచగలమని చంద్రబాబు ఒక కొత్త సూత్రాన్ని చెప్పారు. ఆదాయాన్ని పెంచే వాళ్లకే సంక్షేమం గురించి మాట్లాడే హక్కు ఉంటుందన్నారు. ప్రస్తుతం రాష్ట్రంలో ఇస్తున్న ‘ఎన్టీఆర్ భరోసా’ పెన్షన్లు దేశంలోనే అతిపెద్ద సంక్షేమ కార్యక్రమమని చెప్పారు. రైతులకు గిట్టుబాటు ధర కల్పించి ఆదుకుంటున్నామని, ‘పీ4’ (పీపుల్స్ ప్రొటెక్ట్ ప్లాన్ ఫర్ పూర్) విధానం ద్వారా సమాజంలో ఉన్న పేద, ధనిక ఆర్థిక అసమానతలను తగ్గిస్తున్నామని వివరించారు. విశాఖపట్నం, అమరావతి, తిరుపతి నగరాలను కేంద్రంగా చేసుకుని రాష్ట్రంలోని అన్ని జిల్లాలను, అన్ని నియోజకవర్గాలను సమానంగా అభివృద్ధి చేస్తూ ముందుకు తీసుకెళ్తామని చంద్రబాబు నాయుడు భరోసా ఇచ్చారు.
