ఆంధ్రప్రదేశ్ లో స్థానిక సంస్థల ఎన్నికలకు సంబంధించిన పనులు వేగంగా మొదలయ్యాయి. ఇప్పటికే పదవీకాలం ముగిసిన గ్రామ పంచాయతీలు, మున్సిపాలిటీలు, నగర పంచాయతీలు, కార్పొరేషన్లకు ఎన్నికలు నిర్వహించేందుకు రాష్ట్ర ఎన్నికల కమిషన్ ఏర్పాట్లు చేస్తోంది. రాష్ట్రంలోని 17 నగర కార్పొరేషన్లు, 82 మున్సిపాలిటీలు, 24 నగర పంచాయతీల్లో వార్డులు, డివిజన్ల వారీగా ఓటర్ల జాబితాలను సిద్ధం చేయాలని ఆదేశించింది. ఈ జాబితాలను సెప్టెంబర్ 3న అధికారికంగా ప్రకటించనున్నారు. ఎన్నికల నిర్వహణలో ఓటర్ల జాబితా చాలా ముఖ్యమైనది. అందువల్ల సెప్టెంబర్ 3 వరకు ఎన్నికల నోటిఫికేషన్ వచ్చే అవకాశం దాదాపుగా లేదనే చెప్పాలి.
ఆగస్టు చివరికి పోలింగ్ కేంద్రాలు
గ్రామ పంచాయతీల వారీగా పోలింగ్ కేంద్రాలను గుర్తించే పని ఆగస్టు చివరికి పూర్తికానుంది. ఆ వివరాలను ఆగస్టు 31న రాష్ట్ర ఎన్నికల కమిషన్కు అందించాలని అధికారులను ఆదేశించారు. ఓటర్ల జాబితాలపై ఫిర్యాదులు వచ్చిన 20 గ్రామ పంచాయతీల్లో మాత్రం కొత్త జాబితాలను ఆగస్టు 17లోగా ప్రకటించాల్సి ఉంది. పోలింగ్ కేంద్రాలు, ఓటర్ల జాబితాలు సిద్ధమైన తర్వాత బ్యాలెట్ పేపర్లు, ఓటింగ్ ఇంక్, బ్యాలెట్ బాక్సులు, ఎన్నికల సిబ్బంది వంటి వాటిపై స్పష్టత రావాలి. మరోవైపు కోర్టు కేసులు ఉన్న మున్సిపాలిటీలు, గ్రామ పంచాయతీలకు సంబంధించిన సమస్యలను కూడా పరిష్కరించాలి. ఈ పనులన్నీ పూర్తి కావడానికి సెప్టెంబర్ నెలలో మరికొంత సమయం పట్టే అవకాశం ఉంది.
రిజర్వేషన్లతోనే అసలు క్లారిటీ
ఎన్నికలు ఎప్పుడు జరుగుతాయనేది ప్రధానంగా రిజర్వేషన్ల ఖరారుపైనే ఆధారపడి ఉంటుంది. స్థానిక ఎన్నికల్లో బీసీలకు ఎంత శాతం రిజర్వేషన్ ఇవ్వాలి అనే విషయంపై ప్రభుత్వం నిర్ణయం తీసుకోవాలి. అలాగే ఎస్సీ, ఎస్టీ, బీసీ, మహిళలకు కేటాయించే స్థానాలను కూడా ప్రకటించాలి. మేయర్లు, మున్సిపల్ చైర్మన్లు, కార్పొరేటర్లు, కౌన్సిలర్లు, సర్పంచి పదవులకు రిజర్వేషన్లు ఖరారైన తర్వాతే అభ్యర్థుల ఎంపిక మొదలవుతుంది. ఆగస్టు 17 నుంచి జరిగే అసెంబ్లీ సమావేశాల సమయంలో బీసీ రిజర్వేషన్లపై ప్రభుత్వం ప్రకటన చేసే అవకాశం ఉంది. అయితే రిజర్వేషన్లపై అభ్యంతరాలు లేదా కోర్టు కేసులు వస్తే ఎన్నికల ప్రక్రియ కొంత ఆలస్యం కావచ్చు.
అక్టోబర్-నవంబర్లో ఎన్నికలు?
ప్రస్తుత ఏర్పాట్లను బట్టి చూస్తే సెప్టెంబర్ మొదటి వారంలో ఎన్నికలు జరిగే అవకాశం లేదు. సెప్టెంబర్ 3న మున్సిపల్ ఓటర్ల జాబితాలు ప్రకటించిన తర్వాత అభ్యంతరాల పరిశీలన, రిజర్వేషన్ల ఖరారు, పోలింగ్ కేంద్రాల తుది జాబితా, ఎన్నికల సామగ్రి సిద్ధం చేయడం వంటి పనులు పూర్తిచేయాలి. అన్నీ అనుకున్నట్లు జరిగితే సెప్టెంబర్ చివరి వారంలో లేదా అక్టోబర్ మొదట్లో ఎన్నికల నోటిఫికేషన్ రావచ్చు. ఆ తర్వాత కనీసం మూడు నుంచి నాలుగు వారాల సమయం ఇచ్చి అక్టోబర్ చివరి నుంచి నవంబర్ మధ్యలో పోలింగ్ నిర్వహించే అవకాశం ఎక్కువగా కనిపిస్తోంది. గ్రామ పంచాయతీలు, మండల-జిల్లా పరిషత్లు, మున్సిపాలిటీలకు ఒకేసారి కాకుండా విడతల వారీగా ఎన్నికలు నిర్వహించవచ్చు. అయితే అధికారిక తేదీలు రాష్ట్ర ఎన్నికల కమిషన్ నోటిఫికేషన్ విడుదల చేసిన తర్వాతే ఖరారవుతాయి.
మరిన్ని వార్తలు:
జమ్మూ కశ్మీర్ ఎన్నికల్లో గెలుపు పగ్గాలు ఎవరివి..?
విశాఖ ఎమ్మెల్సీ ఎన్నికల హీట్..! గెలుపు ఎవరిది?
