అమెరికా అధ్యక్షుడు డొనాల్డ్‌ ట్రంప్‌ విదేశీయుల వీసాల విషయంలో కఠినంగా వ్యవహరిస్తున్నారు. రెండోసారి అధ్యక్షుడిగా బాధ్యతలు చేపట్టిన తర్వాత సుమారు మూడు లక్షల వీసాలను రద్దు చేసినట్లు అమెరికా విదేశాంగ శాఖ వెల్లడించింది. వీటిలో ‘బర్త్‌ టూరిజం’ కోసం అమెరికాకు వచ్చినవారి వీసాలు కూడా ఉన్నాయి.
బర్త్‌ టూరిజంపై అమెరికా ప్రత్యేక దృష్టి
అంటే, అమెరికాలో బిడ్డకు జన్మనివ్వడం ద్వారా ఆ బిడ్డకు అక్కడి పౌరసత్వం పొందే అవకాశం కల్పించాలనే ఉద్దేశంతో ప్రయాణించడాన్ని బర్త్‌ టూరిజం అంటారు. ఇలాంటి చర్యలకు సహకరించారని ఆరోపణలు ఎదుర్కొంటున్నవారికి సంబంధించిన సుమారు 4,000 వీసాలనూ రద్దు చేసినట్లు సమాచారం.
హింస, మోసాలు, చట్టాల ఉల్లంఘనలపై చర్యలు
రద్దు చేసిన వీసాల్లో మరికొన్ని హింసకు పాల్పడటం, ప్రజల భద్రతకు ముప్పు కలిగించడం, మోసాలు చేయడం, తప్పుడు సమాచారం వ్యాప్తి చేయడం, మద్యం తాగి వాహనాలు నడపడం వంటి ఉల్లంఘనలకు సంబంధించినవి ఉన్నాయి. ఈ విషయాన్ని అమెరికా విదేశాంగ శాఖ ప్రతినిధి టామీ పిగాట్ ధ్రువీకరించారు. అయితే, ఏ దేశానికి చెందినవారి వీసాలు ఎక్కువగా రద్దయ్యాయనే వివరాలను ప్రభుత్వం వెల్లడించలేదు. చట్టాలను ఉల్లంఘించే విదేశీయులు, అమెరికా జాతీయ భద్రతకు ముప్పుగా మారేవారిపై కఠిన చర్యలు తీసుకుంటామని విదేశాంగ శాఖ స్పష్టం చేసింది.
సోషల్‌ మీడియా ఖాతాలపైనా నిఘా
ట్రంప్‌ రెండోసారి అధికారంలోకి వచ్చిన తర్వాత అక్రమ వలసదారులను వెనక్కి పంపించే చర్యలను కూడా వేగవంతం చేశారు. వీసా కోసం దరఖాస్తు చేసుకునేవారి సోషల్‌ మీడియా ఖాతాలను పరిశీలించే విధానాన్ని విస్తరించారు. దరఖాస్తుదారుల వివరాలను మరింత క్షుణ్ణంగా తనిఖీ చేయడంపై దృష్టి పెట్టారు. గతంలో కంటే వీసాల రద్దు సంఖ్య రెట్టింపైనట్లు స్థానిక మీడియా కథనాలు వెల్లడించాయి. గతేడాది జనవరి నుంచి చేపట్టిన చర్యల్లో భాగంగానే ఈ పెరుగుదల కనిపించినట్లు సమాచారం.
వీసాల గడువు దాటినా ఉంటే కఠిన చర్యలు
ముఖ్యంగా వీసా గడువు ముగిసినా అమెరికాలోనే ఉండిపోవడం, స్థానిక చట్టాలను ఉల్లంఘించడం వంటి చర్యలకు పాల్పడుతున్న విదేశీయులపై అధికారులు నిఘా పెంచారు. విదేశీ విద్యార్థుల విషయంలోనూ తనిఖీలు కఠినతరం చేశారు. అమెరికాలో ఉండాలంటే అక్కడి నిబంధనలను పాటించాల్సిందేనని ట్రంప్‌ ప్రభుత్వం స్పష్టం చేస్తోంది. ఈ చర్యలు విదేశీయులపై వీసా తనిఖీలు, చట్టాల అమలు విషయంలో అమెరికా మరింత కఠినంగా వ్యవహరిస్తోందని సూచిస్తున్నాయి.
