ఆంధ్రప్రదేశ్ ముఖ్యమంత్రి నారా చంద్రబాబు నాయుడు సంస్కరణల సారథిగా మరో అంతర్జాతీయ స్థాయి గుర్తింపును అందుకున్నారు. ప్రముఖ ఆర్థిక దినపత్రిక ‘ఎకనామిక్ టైమ్స్’ ప్రకటించిన ప్రతిష్ఠాత్మక ‘బిజినెస్ రీఫార్మర్ ఆఫ్ ది ఇయర్’ అవార్డును నేడు (25-04-2026) ముంబైలో జరిగే ఘనమైన వేడుకలో ఆయన స్వీకరించనున్నారు. దేశ ఆర్థిక రాజధాని వేదికగా, కేంద్ర ఆర్థిక మంత్రి చేతుల మీదుగా ఈ పురస్కారం అందుకోవడం తెలుగు జాతి గర్వించదగ్గ విషయం. రాష్ట్రంలో పెట్టుబడులను ఆకర్షించడంలో, పరిపాలనలో ఆధునిక సంస్కరణలు ప్రవేశపెట్టడంలో ఆయన చూపిస్తున్న నిరంతర కృషికి ఈ అవార్డు దక్కింది.
పరిపాలనలో సంస్కరణలు, పెట్టుబడుల వృద్ధి
రాజకీయ అనుభవం, ఆధునిక పరిపాలన మేళవిస్తే అభివృద్ధి ఏ స్థాయిలో ఉంటుందో చంద్రబాబు నాయుడు గారి పాలనే సాక్ష్యం. రాష్ట్రాన్ని కేవలం ఒక పాలనా యూనిట్గా కాకుండా, ఒక ‘గ్రోత్ ఎకానమీ’గా తీర్చిదిద్దాలన్న ఆయన దార్శనికతకు ఈ అవార్డు నిదర్శనం. ముఖ్యంగా ఐటీ, మౌలిక వసతులు, పారిశ్రామిక వృద్ధి మరియు ‘స్పీడ్ ఆఫ్ డూయింగ్ బిజినెస్’ వంటి రంగాలలో ఆయన చూపిన స్పష్టమైన విజన్ ప్రపంచ దృష్టిని ఆకర్షించింది. గత 22 నెలల కాలంలోనే సుమారు రూ. 20 లక్షల కోట్ల విలువైన పెట్టుబడులను రాష్ట్రానికి తీసుకురావడం ఆయన పాలనా దక్షతకు ధృవీకరణ.
ఐటీ, పారిశ్రామిక రంగాల్లో విజన్
ఉమ్మడి రాష్ట్ర కాలం నుంచే సాంకేతికత ఆధారిత పరిపాలనకు చంద్రబాబు బ్రాండ్ అంబాసిడర్గా ఉన్నారు. హైదరాబాద్ను ఐటీ హబ్గా మార్చిన విజనరీగా ఆయనకున్న గుర్తింపు అచంచలమైనది. విభజన అనంతరం ఆర్థికంగా దెబ్బతిన్న ఆంధ్రప్రదేశ్ను నిలబెట్టేందుకు ఆయన ప్రవేశపెట్టిన ‘సింగిల్ విండో క్లియరెన్స్’ వంటి పారదర్శక విధానాలు వ్యాపార వర్గాల్లో నమ్మకాన్ని పెంచాయి. అమరావతిని ప్రపంచస్థాయి నగరంగా, విశాఖను డేటా సెంటర్ల హబ్గా మార్చడంలో ఆయన పట్టుదల పారిశ్రామిక దిగ్గజాలను మెప్పించింది. ఈ క్రమంలోనే సునీల్ భారతి మిట్టల్, సజ్జన్ జిందాల్, ఉదయ్ కోటక్, డాక్టర్ దేవిశెట్టి, అభిషేక్ మను సింఘ్వి మరియు నోయల్ టాటా వంటి దిగ్గజాలతో కూడిన జ్యూరీ ఏకగ్రీవంగా చంద్రబాబును ఈ పురస్కారానికి ఎంపిక చేసింది.
అభివృద్ధికి లభించిన గుర్తింపు..
నిజమైన సంస్కరణలు అంటే కేవలం నిర్ణయాలు తీసుకోవడం కాదు, వ్యవస్థలో మార్పు తీసుకురావడం. రాజకీయ విమర్శలు తాత్కాలికమని, అభివృద్ధి ద్వారా వచ్చే గుర్తింపు మాత్రమే శాశ్వతమని ఈ పురస్కారం నిరూపించింది. సాహసోపేత నిర్ణయాలు, సుదూర ఆలోచన, అభివృద్ధి పట్ల అంకితభావం కలగలిసిన నాయకత్వానికి దక్కిన గౌరవం ఇది. రాష్ట్రాన్ని ప్రగతి పథంలో నడిపిస్తూ, నవతరం భవిష్యత్తు కోసం నిరంతరం శ్రమిస్తున్న చంద్రబాబు నాయుడు గారికి దక్కిన ఈ ‘బిజినెస్ రీఫార్మర్ ఆఫ్ ది ఇయర్’ అవార్డు నవ్యాంధ్ర పునర్నిర్మాణ సంకల్పానికి లభించిన జాతీయ స్థాయి ధృవీకరణ.
సీఎం చంద్రబాబుకు ‘బిజినెస్ రిఫార్మర్ ఆఫ్ ద ఇయర్’ పురస్కారం
