ప్రతిరోజూ ఉదయం లేవగానే చాలామంది చేసే మొదటి సెర్చ్లలో గోల్డ్ రేట్ కూడా ఉంటుంది. ఇవాళ ఎంత ఉంది? ఇంకా పెరుగుతుందా? తగ్గుతుందా? ఇప్పుడు కొనేయాలా? ఇంకొంత కాలం ఆగాలా? అనే చర్చలు కూడా ఎప్పుడూ ఉంటూనే ఉంటాయి. ముఖ్యంగా పెళ్లిళ్లు, పండుగలు, కుటుంబ అవసరాల కోసం బంగారం కొనేవారికి ఈ ఆలోచనలు మరింత ఎక్కువగా ఉంటాయి.
బంగారం కొనాలా? ముందు ఈ లెక్క తెలుసుకోండి
పెట్టుబడి కోసం కొనేవారికి కూడా ఇదే పరిస్థితి. ధర పెరుగుతున్నప్పుడు ఇప్పుడే కొనకపోతే తర్వాత మరింత ఖరీదవుతుందేమో అనిపిస్తుంది. ధర తగ్గినప్పుడు ఇంకాస్త తగ్గుతుందేమో అని ఆగుతాం. చివరికి ఏ సమయంలో కొనాలి అన్నది పెద్ద ప్రశ్నగా మారుతుంది. అందుకే బంగారం కొనాలా వద్దా అన్నదానికంటే, ఎందుకు కొంటున్నాం, ఎంత మొత్తంలో కొనాలి, ఒకేసారి కొనాలా లేక విడతలుగా కొనాలా అన్నది ముందుగా ఆలోచించడం ముఖ్యం.
2026లో బంగారం ధర ప్రయాణం ఏం చెబుతోంది?
2026లో ఇప్పటివరకు బంగారం ధర ప్రయాణం చూస్తే ఈ విషయం మరింత స్పష్టంగా అర్థమవుతుంది. జనవరిలో దాదాపు రూ.2 లక్షల స్థాయికి చేరిన పసిడి, ఆ తర్వాత ఒక్కసారిగా వెనక్కి వచ్చింది. మార్చి నాటికి సుమారు రూ.1.30 లక్షల ప్రాంతానికి చేరడంతో గరిష్ఠ స్థాయి నుంచి దాదాపు 23 శాతం వరకు కరెక్షన్ కనిపించింది. ఆ తర్వాత కూడా ధరలో హెచ్చుతగ్గులు కొనసాగాయి. జూన్లో మరోసారి ఒత్తిడి కనిపించినా, ఆగస్టులో బంగారం మళ్లీ పైకి కదలడం మొదలుపెట్టింది. ఇదే బంగారం ప్రత్యేకత. ధర పెరుగుతున్నప్పుడు ఇంకా పెరుగుతుందేమోనని కొనాలని అనిపిస్తుంది. తగ్గుతున్నప్పుడు ఇంకాస్త తగ్గాక కొందామని అనిపిస్తుంది. కానీ ఆ ‘సరైన సమయం’ కోసం ఎదురుచూస్తూనే చాలామంది కొనుగోలు నిర్ణయాన్ని వాయిదా వేస్తుంటారు. అందుకే బంగారం ఎప్పుడూ ఒకే దిశలో ప్రయాణించదన్న విషయాన్ని గుర్తుంచుకోవాలి.
గోల్డ్ రేట్ ఎందుకు పెరుగుతుంది? ఎందుకు తగ్గుతుంది?
ఇటీవల బంగారం ధర పెరగడానికి కూడా ఒక్క కారణం లేదు. ప్రపంచంలో ఎక్కడైనా యుద్ధాలు, ఉద్రిక్తతలు పెరిగినా, ఆర్థిక పరిస్థితులపై అనుమానాలు వచ్చినా పెట్టుబడిదారులు సాధారణంగా బంగారం వైపు చూస్తారు. వడ్డీ రేట్లపై అంచనాలు, డాలర్ కదలికలు, రూపాయి విలువ, కేంద్ర బ్యాంకులు కొనుగోలు చేసే బంగారం, అంతర్జాతీయ మార్కెట్లో డిమాండ్ వంటి అంశాలు కూడా ధరపై ప్రభావం చూపుతాయి. దేశీయంగా చూస్తే అధిక ధరల కారణంగా ఆభరణాల కొనుగోళ్లు కొంత తగ్గినా, బంగారు కాయిన్లు, బార్లు, గోల్డ్ ఈటీఎఫ్లకు పెట్టుబడి డిమాండ్ ఉండొచ్చు. అదే సమయంలో బంగారం ధర పడిపోవడానికి కూడా కారణాలు ఉంటాయి. లాభాలు తీసుకునే పెట్టుబడిదారులు పెరగడం, డాలర్ బలపడటం, వడ్డీ రేట్లపై అంచనాలు మారడం, ప్రపంచ ఆర్థిక పరిస్థితులు మెరుగుపడటం వంటివి ధరపై ఒత్తిడి తెచ్చే అవకాశం ఉంటుంది. అంటే బంగారం ధర ఎప్పుడూ పెరుగుతూనే ఉంటుందని అనుకోవడం ఎంత తప్పో, ఒక్కసారి పడిపోయిందంటే ఇక పెరగదని అనుకోవడం కూడా అంతే తప్పు.
అందుకే ఇప్పుడు బంగారం కొనాలా? అన్న ప్రశ్నకు అందరికీ ఒకే సమాధానం ఉండదు. పెళ్లి లేదా కుటుంబ అవసరం కోసం తప్పనిసరిగా కొనాల్సి ఉంటే.. ఒక్కరోజు ధరను చూసి నిర్ణయం తీసుకోవడం కంటే అవసరానికి తగ్గట్టుగా కొనడం మంచిది. పెట్టుబడి కోసం చూస్తున్నవారు అయితే మొత్తం డబ్బును ఒకేసారి బంగారంలో పెట్టడం కంటే విడతలుగా పెట్టుబడి పెట్టే విధానాన్ని ఆలోచించవచ్చు. బంగారం ధర మళ్లీ రూ.2 లక్షలకు వెళ్తుందా? లేక లక్ష రూపాయల దగ్గరకు పడిపోతుందా? అని ఖచ్చితంగా చెప్పడం ఎవరి వల్లా కాదు. ప్రపంచ పరిస్థితులు మారితే అంచనాలు కూడా మారిపోతాయి. కాబట్టి ధర ఎక్కడికి వెళ్తుందో ఊహించడం కంటే, మన అవసరం ఏంటి, మన దగ్గర ఉన్న డబ్బులో ఎంత బంగారానికి కేటాయించాలి, ఆభరణం కావాలా లేక పెట్టుబడి రూపంలో కావాలా అనే విషయాలపై దృష్టి పెట్టడం మంచిది. బంగారంలో అసలు తెలివైన నిర్ణయం ‘ఎప్పుడు కొనాలి?’ అనే దానికంటే ‘ఎలా కొనాలి?’ అనేదే.
